Алматы қаласындағы №7 қалалық клиникалық ауруханада алғаш рет AVEIR™ VR сымсыз кардиостимуляторын имплантациялау бойынша бірегей ота жасалды. Қазақ аритмологтар қоғамының президенті, Астана қаласы ПІБ медициналық орталығы ауруханасының дәрігері, профессор Аян Абдрахмановтың қатысуымен өткен шеберлік сағатында бірнеше сәтті ота жасалды. Алматы қаласының №7 ҚКА-да AVEIR™ VR имплантациясы алғаш рет қолданылды. Бұған дейін мұндай жедел араласулар Астананың бірнеше мамандандырылған медициналық ұйымдарында ғана жүргізілген.
Жүрек ырғағының бұзылуы және айқын жүрек қақпақшаларының патологияларын емдеуде AVEIR™ VR имплантациялау әдісі жүрек-қан тамырлары жүйесінің ауыр дерттерімен сырқаттанған пациенттерге заманауи инновациялық шешім ретінде қарастырылуда. Клиникада мамандардың біліктілігін арттыру жүйелі түрде жүргізіліп, үздік клиникалардың жетекші мамандарымен шеберлік сағаттары жиі өткізіледі. Осы шеберлік сағаттың арқасында жүрек-қан тамырлары ауруларымен ауыратын пациенттердің өмір сүру сапасын жақсартуға бағытталған жаңа технология енгізілді.
Шеберлік сағат аясында №7 қалалық клиникалық аурухананың интервенциялық аритмологтары, хирургтері, кардиологтары және анестезиолог-реаниматологтары Аян Абдрахмановпен бірге үш бірегей ота жасады. Пациенттердің бірі 70 жастағы азамат, оның жүрек-қан тамырлары аурулары, жоғары қан қысымы, жүректің ишемиялық ауруы, сондай-ақ бірнеше күрделі оталар жасалған жағдайы болды. Науқас жүрек соғу жиілігінің минутына 10 соққыға дейін төмендеуі салдарынан есінен танып, жедел жәрдем бригадасымен ауруханаға жеткізілген. Қажетті тексерулерден кейін, оған электроды жоқ электрокардиостимуляторды имплантациялау ұсынылды.
№7 ҚКА интервенциялық хирургия және аритмология бөлімшесінің дәрігері Қанат Ергешов AVEIR™ VR кардиостимуляторын имплантациялау күрделі аритмия жағдайларын емдеуде жаңа мүмкіндіктер ашатынын атап өтті. Оның айтуынша, бұл құрылғының артықшылығы – операцияның тіліксіз және жалпы анестезиясыз жүргізілуі, асқыну қаупінің төмендігі және пациенттің қысқа уақытта оңалуы.
AVEIR™ VR құрылғысының басқа да ерекшеліктеріне шағын өлшемдері, 20 жылға дейін ұзартылған батарея қызметі, жүрек қызметін қашықтан бақылау, температуралық негізде жиілікті бейімдеу, МРТ-ге төзімділігі және аз инвазивті имплантация жатады. Бұл технология, әсіресе, балаларға және дәстүрлі әдістер қолжетімсіз пациенттерге ерекше тиімді.
Барлық үш ота жоспарға сай сәтті өтті, шығындар әлеуметтік медициналық сақтандыру қоры есебінен қаржыландырылды. Пациенттер ауруханадан шығарылып, амбулаториялық бақылауда болады.