22 мамырда Алматыдағы Шона Смаханұлы атындағы №62 гимназияда ерекше іс-шара өтті, - деп хабарлайды aqshamnews.kz тілшісі.
Оқу-ағарту министрлігі мен Балалар құқығын қорғау комитетінің бастамасымен, Халықаралық балаларды қорғау күніне орай ұйымдастырылған "Қазақстан Балалары" тұжырымдамасы аясында 2-9 сынып оқушылары арасында "Әкем – тірегім, анам – жүрегім" тақырыбында балалар сурет байқауы ұйымдастырылды.
Бұл байқаудың басты мақсаты – жас ұрпақтың бойына отбасыға деген құрметті, ұлттық салт-дәстүрге деген сүйіспеншілікті және отбасылық құндылықтарды насихаттау болды.
Іс-шара барысында 300-ге жуық оқушы өз туындыларын ұсынып, олармен бірге ата-аналар мен ұстаздар да белсене атсалысты.
Балалардың салған суреттері көз қуантады: онда әкеге деген сенім, анаға деген махаббат, бауырмалдық пен мейірім, бірлік пен татулық сияқты отбасы ұғымының терең мәні көрініс тапты.
Іс-шара ұстаздар мен ата-аналардың қолдауымен жылы атмосферада өтті. Балалар тек өз шығармашылық қабілеттерін емес, отбасыға деген көзқарасын, ішкі жан дүниесін де қағаз бетіне түсіре алды.
Бұл байқау – болашақ ұрпақтың сана-сезіміне отбасы құндылықтарын сіңіруде маңызды қадам. Осындай іс-шаралар балалардың көркемдік қабілеттерін шыңдап қана қоймай, олардың рухани дамуына да үлкен әсер етеді.