Алматы қаласында Ұлы Отан соғысындағы Жеңістің 80 жылдығына арналған «Батырлар сөйлейді…» атты ауқымды әлеуметтік жобаның финалы өтті, деп хабарлайды aqshamnews.kz
Қала мектептерінің 9000-ға жуық оқушысы, педагогтері мен ата-аналар қауымдастығы атсалысқан бұл бастама - жас ұрпақтың бойында отансүйгіштік рухты қалыптастыруға бағытталған маңызды қадам болды.
Жобаны Алматы қаласы Білім басқармасына қарасты Қалалық білім берудегі жаңа технологиялардың ғылыми-әдістемелік орталығы ұйымдастырды.
Мектепішілік, аудандық және қалалық үш кезеңнен тұрған «Батырлар сөйлейді…» жобасының қорытынды кезеңіне мегаполистегі 216 мектептен іріктеліп шыққан үздік командалар қатысты.
Финалда оқушылар соғыс жылдарында ерлік көрсеткен қаһармандар - Мәншүк Мәметова, Әлия Молдағұлова, Бауыржан Момышұлы, Нүркен Әбдіров, Хиуаз Доспанова, Талғат Бигелдинов және басқа да батырлардың бейнесін сахнада көркем түрде сомдады. Театрландырылған қойылымдар, әдеби-музыкалық композициялар мен майдан әндері арқылы олар батырлардың рухын тірілткендей әсер қалдырды. Заманауи жасанды интеллект технологияларының көмегімен батырлардың дауысы мен бейнесі қайта жаңғырып, жас ұрпаққа үн қатты.
Қалалық әдістемелік орталық директоры Даурен Сағынғалиевтің айтуынша, бұл жоба - Алматы білім жүйесіндегі ең ауқымды әрі мазмұны терең шаралардың бірі.
– Ұлы Жеңістің қаһармандары — өткеннің ғана емес, бүгін мен болашақтың да рухани темірқазығы. Бұл жобаның негізгі мақсаты – тарихымыздағы ерлік пен елдік үлгілерін бүгінгі жас буынның санасына сіңіру, – деді ол.
Жоба аясында қала мектептерінде 2500-ден астам патриоттық бағыттағы іс-шаралар өтті. Ал әлеуметтік желілерде 600-ден астам бейнеролик пен 3000-нан астам материал жарияланып, қоғамда кең қолдау мен терең әсер тудырды.