9 мамыр күні 28 гвардияшы-панфиловшылар саябағында Ұлы Жеңістің 80 жылдығына арналған ауқымды концерттік бағдарлама өтеді, деп хабарлайды Aqshamnews.kz
Саябақтаі сағат 9:30-да Қанат Ахметов жетекшілік ететін Мемлекеттік үрмелі оркестрдің қатысуымен Мәңгілік алауға гүл шоқтарын қою рәсімі басталады. Ардагерлерге дала асханасынан тағам ұсынылады, сондай-ақ, олар үшін арнайы шатырда жеке концерттік бағдарлама ұйымдастырылады.
Саябақта алматылықтар мен қала қонақтарына арнап сағат 09:45-тен 21:00-ге дейін басты сахнада музыка үзіліссіз шырқалады – мерекелік концерттер күн бойы жалғасады.
Күндізгі бағдарлама Алматы қаласы әкімінің эстрадалық-симфониялық оркестрінің «AlJazz Symphony»-нің маэстро Александр Беляков басқарған салтанатты өнер көрсетуімен басталады. Оркестрдің сүйемелдеуімен «Синий платочек», «Темная ночь», «Эх, дороги», «Журавли», «Нам нужна одна победа», «День Победы», «Жеңіс күні», «Соғыстан қайтқан солдаттар», «Кестелі орамал», «Әлия» және т.б. соғыс жылдарындағы танымал шығармалар мен патриоттық әндер шырқалады.
Бағдарламаға Қазақстанның танымал әншілері: Төлеген Рахымбаев, Венера Алпысбаева, Олег Татамиров, Алексей Тимофеев, Толқын Забирова, Береке Еңкебаева, Бақтияр Тайлақбаев, Игорь Благодарный, Мақсат Саматов, сондай-ақ, Art Classic, Il Canto, La Bella вокалды ансамбльдері және басқалар қатысады.
Музыкалық эстафетаны «Қасымның әндері-ай» концерті, Қазақстанның халық артисі Талғат Күзембаев пен «Генерал» тобының жеке концерттері жалғастырады.
Сағат 19:00-де Көктөбе телемұнарасында Ұлы Отан соғысының атақты қазақстандық батырларының есімдері жазылған мультимедиялық Жеңіс күніне арналған құттықтау басталады – бұл Ұлы Жеңіс тарихына есімдері алтын әріптермен жазылған қаһармандарға тағзым ету.
Сағат 19:00-ден 21:00-ге дейін көрермендерді қазақстандық эстрада жұлдыздарының қатысуымен кешкі концерт күтеді. Il Canto және La Bella квартеттері «Смуглянка» мен «Катюша» әндерін орындайды, Аркаим дуэті, «Алатау серілері» және «Жұмыр қылыш» ансамбльдері ұлттық әуен шырқайды. Сай Махамбет, Ержан Максим, Нұржан Керменбаев, Жұбаныш Жексенұлы және басқа да әншілер жеке орындауларын ұсынады. Кешті «КешYOU», JasStars, «Алдаспан» және «Жігіттер» топтарының өнері түйіндейді.
Жеңіс әндері 10 және 11 мамыр күндері де 28 гвардияшы-панфиловшылар саябағында ашық аспан астында шырқала береді.
10 мамыр күні сағат 11:00-ден 15:00-ке дейін Даңқ ескерткішінің жанындағы сахнада «Сазген сазы» ансамблі ұлттық күйлермен, «Арқайым» этно-тобы, «МузАрт Life» ұжымы, «Жеті ғажайып» театры, Сұлушаш Нұрмағанбетова, Ғарифа Игісінова, Еркеш Хасенов, Қазыбек Әдікей, Ақылбек Жеменей, Өктем Алтаев, Дәлел Уәшев және Индира Елемес өнер көрсетеді.
11 мамыр күні сағат 12:00-де «Ешкім де ұмытылмайды, ешнәрсе де ұмытылмайды!» атты концертпен мерекелік бағдарлама жалғасады. Сахнаға халық аспаптар ансамблі «Сазген сазы», сондай-ақ, Саят Нұрғазин, Бауыржан Мусин және Жеңіс Ержанов шығады. Сағат 13:00-де «Асыл» тобы өнер көрсетеді, ал «Алматы әуендері» артистері Талғат Күзембаев, Дәурен Байборы, Эрик Төленов, Тахмина Әшімбекова және Қазыбек Әдікеймен дуэтте соңғы болып өнер көрсетеді.
Баршаңызды отбасымен бірге келіп, батыр бабаларымызды еске алып, Жеңіс әндерін тыңдап, алғыс пен мақтаныш рухында уақыт өткізуге шақырамыз.