Рейд барысында полицейлер қоғамдық орындарда алкоголь ішу, спирттік ішімдіктерді заңсыз сату және тәртіп бұзу деректері бойынша ондаған құқық бұзушылықты әшкереледі, – деп хабарлайды aqshamnews.kz тілшісі.
Алматы қаласында мас күйінде жасалатын құқық бұзушылықтар мен қылмыстардың алдын алуға бағытталған «Алко-стоп» жедел-профилактикалық іс-шарасы қарқынды жүргізілуде.
Іс-шараның негізгі басымдығы – кәмелетке толмағандар арасындағы профилактикалық жұмыстарды күшейту, есепте тұрған тұлғалардың тәртібін қадағалау және алкоголь өнімдерінің заңсыз айналымына тосқауыл қою. Бір күннің өзінде қаланың түрлі аудандарында жүргізілген тексеріс кезінде жалпы көлемі 840 литрден асатын ірі алкоголь партиясы тәркіленді.
Алматы қаласы ПД Қоғамдық қауіпсіздік басқармасының бастығы Тимур Ноғайбаевтың айтуынша, бақылау шаралары сату процесіне де, азаматтардың қоғамдық орындардағы мінез-құлқына да қатысты қатаңдатылған. Тәртіп сақшылары жастарды құқыққа қарсы әрекеттерден қорғау үшін профилактикалық жұмыстарды жүйелі түрде жалғастыра беретінін мәлімдеп, азаматтарды заң талаптарын сақтауға шақырады.