Қазіргі уақытта қалада 6 ересек пен 20 бала ауруханада жатыр, барлығының жағдайының ауырлығы орташа.
Жалпы, 27 ақпаннан бүгінге дейін «қызылша» диагнозы 6 ересек пен 67 балада зертханалық түрде расталған, деп хабарлайды Almaty-akshamy.kz.
Емделіп шыққан және стационарда емделіп жатқандар арасында аяғы ауыр және босанған әйелдер тіркелген жоқ.
Бұл туралы ӨКҚ-да өткен брифингте Алматы қаласы қоғамдық денсаулық сақтау басқармасы басшысының орынбасары Назгүл Иманғалиева айтты.
Сондай-ақ, балалар арасында қызылша ауруының төмендеуіне Қазақстан Республикасы Ұлттық екпе күнтізбесіне сәйкес жоспарлы иммундау ғана ықпал ететіні айтылды. Вакцинация Т-лимфоциттер мен антиденелерді өндіру арқылы иммундық жүйені белсендіруге көмектеседі.
«Ата-аналарды тек қызылшаға ғана емес, қызамық пен паротитке қарсы вакцина алуға тағы бір шақырамын. Вакцинация 1 жастағы балаларға жасалады. Болашақта тұрақты иммунитетті сақтап қалу үшін вакцинация 6 жаста тағы бір қайталанады. Вакцинация тұрғылықты жеріңіз бойынша емханада жасалады. Халық арасында иммундық емес қатардың төмендеуі ғана халықтың бұл инфекцияға бейімділігін айтарлықтай төмендетеді», - деп атап өтті ол.