Жаңарған кітапханаға келушілер саны 60%-дан асқан.
Алматы кітапханалары жаңа жұмыс форматына көшті. Бұл туралы Өңірлік коммуникациялар қызметінің баспасөз конференциясы кезінде қалалық мәдениет басқармасының басшысы Ғани Майлыбаев мәлімдеді, деп хабарлайды Almaty-akshamy.kz.
Мегаполистің орталықтандырылған кітапханалар жүйесінің объектілерін модернизациялау Алматы әкімі Бақытжан Сағынтаевтың тапсырмасына сәйкес жүргізілуде.
Ғани Майлыбаевтың мәліметінше, қаланың 16 кітапханасы модернизацияланды. Форматтың жаңаруынан кейін келушілер саны 60%-дан асқан. Кітапханаға жөндеу жұмыстары жүргізілгенге дейін 758 000 адам келсе, бүгінде келушілердің саны 1 260 000 адамды құрайды.
Жаңа кітапханалар сыртқы келбетін өзгертіп қана қоймай, жұмыс режимін де өзгертті. Енді олар апта бойына күн сайын 9.00-ден 20.00-ге дейін жұмыс істейтін болады. Модернизациядан кейін әр кітапханада орындар саны артты, жеке жұмысқа, қарым-қатынасқа, іс-шараларға және интернет-бөлмелерге арналған түрлі бұрыштар құрылды.
Ғани Майлыбаев кітапханаларға жаңа тыныс берілгенін, мұнда тегін шығармашылық үйірмелер өткізілетінін, әдеби сурет залдары мен шеберлік сыныптары ұйымдастырылғанын айтады. Модернизациядан кейін 90-нан астам үйірме құрылды, оған 9 400-ден астам адам қатысады.
«Биыл Бостандық және Медеу аудандарының тағы 2 қалалық кітапханалары модернизацияланады», - деді Ғани Майлыбаев.