Алматы қаласының N7 қалалық клиникалық ауруханасының қабылдау бөлімшесіне 1922 жылы туған науқас жедел түрде түсті, деп хабарлайды Аlmaty-akshamy.kz емхананың баспасөз қызметіне сілтеме жасап.
100 жасар әже үйінде құлағаннан кейін алған жарақатына байланысты сол жақ жамбас буынындағы ауруына шағымданды. Қажетті диагностикалық зерттеулерді жүргізгеннен кейін диагноз қойылды: ығысуы бар сол жақ сан сүйегінің мойын бөлігінің жабық сынуы.
Деформациялар, аяқ-қолдарды қалыпты түрде бүгуге және босатуға қабілетсіздігі, сыну және бірге жүретін ауырсынулар сияқты көрсеткіштер болған кезде, ота жасауға рұқсат етіледі. Әдетте, егде жастағы адамдарда феморальды мойынның сынуы кезінде консервативті емдеу көмектеспейді. Науқастың жасы ұлғайғанын, қатар жүретін аурулардың болуын ескере отырып, кардиолог, интернист, анестезиолог дәрігерлер кеңес өткізілді.
Операциялық бригада құрамына травматологтар Аскеров Р.А., Утешев Б.Б., анестезиолог-реаниматолог Датбаев М.Ж. және медбике Туленова Ж.А. енгізілді. Жасалған ота түрі - сол жақ жамбас буынының Strayker протезімен тотальды цементсіз артропластикасы.
Операция жоғары деңгейде өтті. Жетінші аурухананың дәрігерлері қарт науқасты аяғына тұрғызды. Травматолог-дәрігер Бауыржан Өтешевтің айтуынша, сәтті жасалған операция науқастың ерте белсенді қимыл жасауына мүмкіндік берді. Науқас ота жасағаннан кейін екінші күні жансақтау бөлімінен политравма бөлімшесіне ауыстырылды.
Дәрігерлердің айтуынша, бөлімшедегі 100 жастағы науқаста сүйек тіндері жасына сәйкес келмейді, оның минералды тығыздығы жоғары, бұл 50, әрі кетсе 60 жастағы адамдарға тән. Науқастың қызының айтуынша, бұл ең алдымен өмір салты, таңертеңгі гимнастикамен, содан кейін гигиеналық процедуралардан басталатын анасының күнделікті дұрыс режимімен байланысты.
Тамақтану да әсер етеді: ол тек үй тағамдарын аз-аздан, қатаң белгіленген уақытта қабылдайды, қуырылған тағамдарды тұтынбайды, сүт өнімдерін көбірек пайдаланады. Айтпақшы, 10 баланы дүниеге әкелген кейуана - қазір көптеген немере-шөберелерінің және 6 шөпшектің бақытты әжесі. Бүгінгі таңда қарияның жағдайы тұрақты, өзін жақсы сезінеді, үйіне шығуға дайындалуда.
"Төсекке таңылмағаным үшін бірінші Аллаға тәуба, одан кейін дәрігерлерге мың алғыс. Анестезияны жеңіл көтердім. Шамасы, заманауи препараттар жақсы және дәрігерлердің де көзқарасы өте зор болды. Оларға өте ризамын. Қазір операциядан кейін мен өзімді жақсы сезінемін", - деді кейуана.