Алматыда алдағы референдумды қолдауға арналған ауқымды іс-шара өтті, деп хабарлайды Aqshamnews.kz тілшісі.
Қала тұрғындары мен жастарының басын қосқан жиынға 10 мыңнан астам адам қатысты.
Кеш барысында алаңда ерекше атмосфера қалыптасты. Көрермендерге танымал қазақстандық өнерпаздар мен шығармашылық ұжымдар концерттік бағдарлама ұсынып, патриоттық рухтағы әндер шырқалды.
Жастар ұйымдары мен студенттік бірлестіктердің өкілдері сөз сөйлеп, азаматтардың қоғамдық-саяси үдерістерге белсенді араласуының маңызын атап өтті. Олардың айтуынша, алдағы референдум ел болашағы үшін маңызды қадамдардың бірі саналады.
Ұйымдастырушылар жастардың белсенділігі олардың мемлекет дамуына бейжай қарамайтынын және маңызды шешімдерді қабылдауға қатысуға дайын екенін көрсетті деп отыр.
Айта кетейік, іс-шара Almaty Arena спорт кешенінде өткен XXV қысқы Олимпиада ойындарының жүлдегерлері мен қатысушыларын салтанатты марапаттау рәсімінен кейін ұйымдастырылды.
Жиын ел өміріне белсенді қатысу идеясын қолдаған жастарды біріктіріп, бірлік пен ортақ мақсат жолындағы ынтымақтастықты айқындады.