Қазір қалада мектептердегі орын тапшылығын азайту шаралары жалғасуда.
Бұл туралы Өңірлік коммуникациялар қызметінің брифингінде Алматы қалалық білім басқармасы басшысының орынбасары Айдын Сайлаубай мәлімдеді.
Ведомство өкілі атап өткендей, қазір қалада мектептердегі орын тапшылығын азайту шаралары жалғасуда. Бүгінде ол 19 611 орынды құрайды.
«Ағымдағы жылдың 1 қыркүйегінде "Қалқаман", "Саялы" және "Томирис" шағынаудандарында 5100 орындық 3 жаңа мектеп және №№191, 146, 125 мектептерде 875 орындық қосалқы ғимараттар ашылады», - деді А. Сайлаубай.
Қаладағы жалғыз үш ауысымды №196 мектептің мәселесі оқу жылының басында «Мәдениет» шағынауданында жобалық қуаты 1500 оқушыға есептелген жаңа мектептің ашылуымен шешімін таппақ.
2022 жылдың соңына дейін 6000 орындық тағы 4 мектепті ("Қалқаман-2", "Қайрат", "Дархан", "Нұркент" шағынаудандарында) пайдалануға беру жоспарлануда. Сондай-ақ №48 және 9 мектептердің қосалқы ғимараттары пайдалануға берілмек.
Қала әкімдігі 1 800 орындық мектептерді орналастыру үшін екі ғимарат сатып алады (Бостандық және Наурызбай аудандарында).
Сонымен қатар, оқу жылының басында жеке инвестициялар есебінен 3250 орындық 6 мектеп (Әуезов ауданында - 280 орындық «Достық» мектебі, Медеу ауданында - 200 орындық «Вундер академия» мектебі, Наурызбай ауданында - 590 орындық «Заман» мектебі, Түрксіб ауданында - 400 орындық Millennium мектебі ашылады, қалған 2 мектеп осы жылдың соңына дейін ашылады).
15 қалалық мектептің «Мектеп спорт алаңдарын модернизациялау» жобасын іске асыруға жергілікті бюджеттен 1 млрд теңге бөлінді, жұмысты оқу жылы басталғанға дейін аяқтау жоспарлануда.