Дүниежүзілік Азаматтық қорғаныс күніне арналған іс-шаралар аясында Алматы қаласының Төтенше жағдайлар департаменті «Алматы қаласының құтқару қызметімен» және ҚР ТЖМ аумақтық бөлімшелерімен бірге 2024 жылғы 1 наурызда сағат 10.00-ден 12.00-ге дейін «Астана» алаңында өрт сөндіру, құтқару және басқа да арнайы құрал-жабдықтардың көрмесін өткізеді, деп хабарлайды almaty-akshamy.kz
Дүниежүзілік Азаматтық қорғаныс күніне арналған көрмеден алматылықтар қаланың авариялық-құтқару күштерінің арнайы құрал-жабдықтарымен танысуға мүмкіндік алады.
- Демонстрациялық көрме - азаматтық қорғау және қауіпсізідік мәдениетін қалыптастыру саласындағы білімді насихаттау мақсатында ұйымдастырылады, сондай-ақ қала тұрғындарын құтқару қызметтері мен құралымдардың мүмкіндіктерімен таныстыру үшін өткізіледі.
- 3000-ден астам оқушы мен студент өрт сөндіруші–құтқарушы мамандағының ерекшеліктерімен таныса алады, олардың ішінде «Жас құтқарушы» мектеп жанындағы клубтардың мүшелері де бар.
- Сонымен бірге ұтқыр платформадағы жер сілкіністерінің симуляторы көрсетіледі. Бұл тренажер жер сілкінісінің көлденең және тік дүмпулерін ұқсататын үй бөлмесінің макетінде көрсетілген.
- 90 метр биіктіктен адамдарды құтқаруға арналған Қазақстандағы ең биік иінді көтергішті жақын жерден көруге болады.
Еске сала кететіні, Халықаралық азаматтық қорғаныс ұйымы (ХАҚҰ) Бас Ассамблеясының шешімімен 1990 жылдан бастап 1 наурыз күні Дүниежүзілік Азаматтық қорғаныс күні болып атап өтілуде. Қазақстан Республикасы 1996 жылы ХАҚҰ мүшелігіне кіріп, халықты, аумақты және шаруашылық жүргізу объектілерді табиғи және техногендік сипаттағы төтенше жағдайлардан қорғау мәселелерін шешу бойынша халықаралық деңгейде белсенді ынтымақтастықты жүзеге асырады.