15 наурыз күні Қазақстанда жаңа Конституция жобасы бойынша республикалық референдум өтеді. Алматы тұрғындары азаматтық ұстанымын білдіріп, қала халқын дауыс беруге шақырып жатыр, – деп хабарлайды aqshamnews.kz тілшісі.
Алматылықтардың пікірінше, референдумға қатысу — әр қазақстандықтың құқығы ғана емес, азаматтық парызы да.
Көпбалалы ана Айнаш Мақұлбекованың айтуынша, ел болашағы әр азаматтың таңдауына байланысты:
«Біз, Қазақстан азаматтары, еліміздің болашағы үшін міндетті түрде келіп, дауыс беруіміз керек. Кім “жақтап”, кім “қарсы” боларын халық шешер. Ең бастысы — қатысу. Біз мемлекеттің дамуы мен балаларымыздың игілігіне бағытталған өзгерістерді қолдаймыз».
Тұғырдан секіру спортының жаттықтырушысы Павел Васильев те пікір білдірді.
«Мен міндетті түрде дауыс беруге барамын. Бұл біздің таңдауымыз, біздің болашағымыз. Сондықтан мұндай науқаннан ешкім шет қалмауы керек».
Зейнеткер Шолпан Сақыпова дауыс беруге саналы түрде қараудың маңыздылығын айтты:
«Референдум — ел үшін маңызды оқиға. Дауыс бермес бұрын Конституцияға ұсынылып отырған өзгерістермен мұқият танысып алу қажет. Әр азамат өзінің азаматтық борышын орындауы тиіс».
Ерікті Қымбат Нұрдәулет жастарды белсенді болуға шақырды:
«Әсіресе жас ұрпақтың қатысуы ерекше маңызды осы жолы. Қазақстанның қандай болары біздің қалай атсалысқанымызға байланысты».
Қала тұрғындары алдағы референдум тәуелсіз әрі еркін Қазақстанның дамуына үлес қосуға үлкен мүмкіндік екенін айтады. Азаматтар дауыс беруге белсене қатысса, мықты әрі жауапты қоғам қалыптасар сенімді.
