Алматыда Satpaev University студенттері үшін салынатын тоғыз қабатты жаңа жатақхананың іргетасына капсула салу рәсімі өтті.
Іс-шара мемлекеттік студенттерді жатақханамен қамтамасыз ету бағдарламасы аясында, Қазақстан Республикасы Ғылым және жоғары білім министрлігіне қарасты «Қаржы орталығы» АҚ қатысуымен ұйымдастырылды.
Салтанатты рәсімге Алматы қаласы Жастар саясаты басқармасының басшысы Әзиз Қажденбек, Satpaev University басшылығы мен белсенділері, сондай-ақ жобаға инвестиция салған компаниялардың өкілдері қатысты.
Жиналғандар мен университеттің ардагер оқытушылары жобаның басталуымен құттықтап, студенттердің жаңа жатақханаға жоспарланған мерзімде, яғни 2026 жылдың басында көшіп баруына тілек білдірді.
- Жаңа жатақхана 319 тұрғын бөлмеден тұрады және 955 студентке арналған. Тоғыз қабатты ғимараттың жалпы ауданы – 11 мың шаршы метрден асады, ал құрылыс алаңы – шамамен 1 гектар. Сондай-ақ, 15 көлікке арналған тұрақ қарастырылған.
– Бұл құрылыс өткен жылы ашылған жатақханалар салу бойынша жобалық кеңсе аясында жүзеге асырылуда. Жоба Мемлекет басшысының бес бастамасы шеңберінде іске асырылып, «Қаржы орталығы» АҚ қатысуымен субсидияланады, – деп атап өтті Жастар саясаты басқармасының басшысы Әзиз Қажденбек.
Әзиз Қажденбектің айтуынша, мегаполис студенттері үшін жатақхана мәселесі өзекті болып қала береді. Биылғы оқу жылы басталғалы бері 1600 орын ашылды.
- Жыл соңына дейін Алматыда жалпы саны 4500 орындық жаңа жатақханалар пайдалануға берілмек. Салыстырмалы түрде алсақ, 2023 жылы 4000 жаңа орын ашылған еді, ал 2025 жылы бұл көрсеткіш одан әрі артады деп күтілуде.