8 наурыз қарсаңында Алматыда өңірлік коммуникациялар қызметінің баспасөз конференциясы өтті.
Онда «Смелость быть первым» корпоративтік қорының атқарушы директоры, «Almaty Marathon» директоры, марафоншы және Ironman Салтанат Қазыбаева әйелдер спортының дамуы, белсенді өмір салтының маңыздылығы және стереотиптерді еңсеру туралы айтты, деп хабарлайды aqshamnews.kz.
Алматыда туып-өскен Салтанат бала кезінен әкесінің арқасында спортпен байланысты болды. Алайда, спикер атап өткендей, ол кәсіби спортпен айналыспаған.
«Бала кезімде өзімді әр түрлі секцияларда сынап көрдім, бірақ еш жерде узаққа қалмадым. Ересек кезімде жүгіруге және триатлонға қызығушылық таныта бастадым, бүгін өзімді Ironman деп атай аламын», - деп бөлісті ол.
Ironman - 4 км жүзуді, 180 км веложарысты және 42 км марафонды қамтитын триатлондағы күрделі жарыс. Бүгінгі таңда Салтанат Қазыбаева бұл қашықтықты 5 рет бағындырып, халықаралық және жергілікті жарыстардың жүлдегері және жеңімпазы атанды.
«Almaty Marathon» басшысы ретінде Салтанат әйелдер спортын белсенді дамытуда. Ол 2012 жылы Алматыда марафондар басталған кезде қатысушылар арасында әйелдер аз болғанын еске салды.
«14 жыл ішінде біздің іс-шараларымызға 39 мыңға жуық адам қатысты. Олардың тек 14 мыңы ғана әйелдер. Бұл жартысынан аз. Бірақ жыл сайын жағдай өзгеруде», - деп атап өтті ол.
Бүгінде Алматыда әйелдер спортпен белсенді айналысып қана қоймай, спорттық жетістіктерді мансаппен, отбасымен және жеке тұлғалық өсуімен біріктіре отырып, елеулі табыстарға қол жеткізуде. Алайда, Қазыбаеваның айтуынша, әлі күнге дейін гендерлік стереотиптер бар.
«Тіпті кәсіби спортта ерлерге көбірек көңіл бөлінеді. Футболда, жеңіл атлетикада, теннисте ерлер арасындағы жарыстар көбірек қаржыландырылады және көрермендер қызығушылығына ие болады. Бірақ арулар да үлкен спорттық нәтижелерге қол жеткізе алады және оны көрсету керек!» - деді ол.
Спорттағы аруларды қолдау үшін бір жыл бұрын әйелдер арасында жүгіру, триатлон және салауатты өмір салтын белсенді түрде насихаттайтын «Trigada» әйелдер спорт қоғамдастығы құрылды.
8 наурыз қарсаңында Trigada қатысушылары 500 қатысушыны жинап, Тұңғыш Президент саябағында әйелдер жүгіруін ұйымдастырды.
«Біз мұндай шаралардың көбірек болғанын қалаймыз, арулар спорттың баршаға қолжетімді екенін түсінулері қажет. Әйелдер спортпен шұғылдануға, жеңіске жетіп, мықты болуға құқылы!» - деп атап өтті Қазыбаева.
Алматы спорттық инфрақұрылымды дамытуды және әйелдер арасында белсенді өмір салтын насихаттауды жалғастыруда. Қалада марафондар, веложарыстар, триатлондар мен фитнес-фестивальдар өтеді, секциялар мен спорттық қауымдастықтар ашылып жатыр.
«Спорт - денсаулық туралы ғана емес, сенімділік, тәртіп және жаңа көкжиектер туралы. Алматы - бұл мүмкіндіктер қаласы, мұнда әрбір ару белсенді өмір мен жеңістерге өз жолын таба алады», - деп қорытындылады Салтанат Қазыбаева.