Алматы қаласы әкімінің орынбасары Абзал Нүкенов әл-Фараби атындағы Қазақ ұлттық университетінде барып, ЖОО-ның қазіргі ғылыми әзірлемелерімен, инфрақұрылымымен және инновациялық мүмкіндіктерімен танысты.
Қала әкімінің орынбасары жоғары технологиялық жобалар мен инновациялық әзірлемелер ұсынатын Farabi Hub инновациялық орталығында болды. Бүгінде хаб ірі инвестициялық компаниялармен, ғылыми-зерттеу институттарымен және жетекші шетелдік университеттермен тығыз әріптестік орнатқан. Заманауи құрылғылармен жабдықталған зертханаларда түрлі бағыт бойынша ғылыми зерттеулер жүргізіліп, жаңа технологиялар әзірленіп жатыр. Орталықтың негізгі мақсаты – ҚазҰУ ғалымдарының ғылыми идеялары мен жобаларын экономикаға енгізуді жеделдету және инновацияларды коммерцияландыру үдерісін күшейту.
Бұдан кейін Абзал Нүкенов Өндірістік робототехника және инженерлік құзыреттер орталығында болды. Мұнда немістің жоғары сапалы KUKA роботтары орнатылған. ҚазҰУ робототехниканы жүйелі дамытып, бұл салада еліміздегі жетекші ғылыми орталықтардың біріне айналып келеді. Университет мамандары зияткерлік жүйелер, ұшқышсыз ұшу аппараттары және автоматтандырылған өндірістік шешімдер бағытында зерттеу жүргізіп отыр.
Әкімнің орынбасары халықаралық деңгейде жұмыс істейтін «Цифрлық технологиялар және робототехника» институтының және Робототехника орталығының қызметімен де танысты. 600 шаршы метр аумақта заманауи өндірістік технологиялар мен жасанды интеллект негізінде құрылған бес инновациялық платформа жұмыс істейді. Мұнда студенттер цифрлық өндіріс үдерістерін, күрделі автоматтандырылған жүйелерді меңгеріп, озық технологиялар саласында тәжірибелік дағдыларды меңгереді.
ЖОО-нын аралаған Нүкенов университет базасында орнатылған суперкомпьютердің жұмысымен танысты. Орталық Азиядағы ең қуатты есептеу жүйелерінің бірі саналатын бұл суперкомпьютер еліміздің ғылыми инфрақұрылымын күшейтіп, ІТ және жасанды интеллект саласындағы мамандарды даярлауға жаңа мүмкіндіктер ашады. Оның есептеу қуаты 2000 терафлопс, ал архитектурасы 400-ден астам Intel Xeon 6330N серверлік процессорларынан тұрады.
Сонымен қатар, Абзал Нүкенов география және табиғатты пайдалану факультетіне барып, ҚазҰУ ғалымдарының табиғатты қорғау, топырақ құнарлылығын арттыру, құрғақшылықтың алдын алу және су сапасын жақсартуға бағытталған ғылыми жобаларымен танысты.
Қала әкімінің орынбасары университеттің техникалық базасының жоғары деңгейін атап, Алматы жастарына сапалы білім беруде заманауи ғылыми орта қалыптастырудың маңыздылығына тоқталды. Ол университет ұжымына ғылыми және инновациялық жобаларды жүзеге асыруда табыс тілеп, қала әкімдігі білім, ғылым және білікті маман даярлау бағытындағы ынтымақтастықты әрі қарай нығайтуға мүдделі екенін жеткізді.