Ішкі істер министрі Ержан Саденов Алматы қаласының полиция департаментінің жеке құрамымен жедел кеңес өткізді. Кездесу барысында Алматы қаласындағы тоғыз ай ішіндегі қызмет қорытындылары талқыланды, деп хабарлайды aqshamnews.kz
Министр құқық қорғау органдарының қызметін бағалап, жедел жағдайды, қылмыстық ахуалды тұрақтандыру және "заң мен тәртіп" қағидатын қамтамасыз ету бағытындағы жұмыстарды жан-жақты талқылады.
Жиын барысында Ержан Саденов бірқатар басшыларды тыңдап, полиция қызметкерлерінің құқық бұзушылықтардың алдын алу мен қылмыстарға мүлдем төзбеушілік қағидатын енгізуге бағытталған жұмыстарының тиімділігін арттыру қажеттігін ерекше атап өтті. Әсіресе, мегаполистегі қоғамдық қауіпсіздік пен құқықтық тәртіпті нығайтуға баса назар аударылды.
Министр полиция жұмысының сапасын жақсарту, азаматтардың қауіпсіздігін қамтамасыз ету, сондай-ақ, заңдылық пен тәртіпті күшейту мақсатында қосымша шаралар қабылдау қажеттігін атап өтті. Қоғамдық орындарда құқық бұзушылықтарды азайту, қылмыстың алдын алу, және қылмыстық істерді ашу бойынша жедел әрекет етуге ерекше көңіл бөлінді.
Сондай-ақ, Ержан Саденов Ішкі істер министрлігіне қарасты барлық құрылымдық бөлімшелердің қызметкерлеріне нақты тапсырмалар жүктеп, алдағы уақытта көрсетілетін қызметтердің сапасын арттыру және тиімділікті одан әрі жақсарту бойынша ұсыныстарды қолға алу қажеттігін атап өтті. Жиын соңында министр бірқатар нақты тапсырмалар беріп, олардың орындалуын бақылауды тапсырды.