Тергеу шаралары жүргізіліп жатыр.
Алматы полицейлері қала тұрғындарын алдады деген күдікпен 27 жастағы азаматты ұстады, деп хабарлайды Almaty-akshamy.kz.
Ішкі істер министрлігінің ресми сайтындағы мәлімет бойынша, Е. есімді жас жігіттің әрекеттерінен келтірілген жалпы материалдық шығын 36 миллион теңгені құраған.
«Зардап шеккендердің бірінің нұсқасы бойынша, ол Е.есімді азаматты бұрыннан біледі, ол бірнеше тиімді тендерлерді ұтып алдым деп сендіріп, бірлескен кәсіпке ақша салуды ұсынады. Оған қаражат аударылғаннан кейін ол хабарласуды тоқтатқан. Сотқа дейінгі тергеу барысында тағы екі қылмыстық эпизод анықталды. Бір жағдайда ер адам өзін тергеуші ретінде таныстырып, қылмыстық істі тоқтатуға көмектесуге уәде беріп, басқа адамдардың ақшасын жымқырған, екіншісінде – элиталық автокөлікті төмен бағамен сатып алуға көмектесемін деп уәде еткен», – дейді Әуезов аудандық полиция басқармасының бастығы Ұлан Әбілқайыр.
Тергеу кезеңінде ұсталған адамға қатысты қамауға алу түріндегі бұлтартпау шарасы таңдалып, уақытша ұстау изоляторына қамалды. Тергеу шаралары жүргізілуде.
