Өңірлік коммуникациялар қызметінің өкілдері Алматы қалалық Полиция департаментінің бастығы, генерал Айдын Қабдулдиновпен кездесті, - деп хабарлайды Aqshamnews.kz.
Генерал Айдын Қабдулдинов бұл қызметке осыдан үш күн бұрын тағайындалған. Ол жұмысын журналистермен кездесуден бастады.
Кездесу барысында ойға алынған негізгі бастамалар сөз болды. Атап айтқанда, Алматыдағы барлық мектепте кезең-кезеңімен «Жас сақшы» дейтін мамандандырылған сыныптарды ашу жоспары. Осы жұмыс аясында «Заң мен Тәртіп» идеологемасы негізінде оқушыларға құқық сабақтарын өткізбек. Бұл өз кезегінде осы бастан жасөспірімдердің құқықтық мәдениетін қалыптастырып, полицияның беделін өсіруге сеп болмақшы.
Өңірлік коммуникациялар қызметінің басшылығы генерал Айдын Қабдулдиновпен бірлесіп, 2026 жылға арналған ортақ жұмыс жоспарын да талқылады. Онда ақпарат құралының өкілдерімен тиімді байланыс орнатып, құқық қорғау органдарын барынша қоғамға ашық етуге күш салмақ ойда.
