У. есімді азамат уақытша ұстау изоляторына қамалды.
Алматы полицейлері пәтер ұрысын ұстады. Ол алтын бұйымдарды ұрлап, үй иесіне 200 мың теңгеден астам материалдық залал келтірген, деп хабарлайды Almaty-akshamy.kz.
Ішкі істер министрлігінің ресми сайтындағы мәлімет бойынша, бұрын сотты болған 1973 жылы туған У. есімді азаматты өткен күні Гагарин көшесіндегі үйлердің бірінің ауласында жедел қызметкерлер ұстаған.
«Ұстауға бірнеше минут қалғанда сотталушы алматылық қыздың пәтерін тонап кеткен. Сол жерден алтын бұйымдарды ұрлап, үй иесіне 200 мың теңгеден астам материалдық залал келтірген ол кіре берістен шыға бергенде құрықталды. Күдіктіден табылған "олжа" процессуалдық тәртіппен тәркіленді. Сонымен қатар, жедел тергеу тобы күдіктіні тексеру кезінде табылған пневматикалық тапаншаны да қылмыстық іс материалдарына тіркеді. У. есімді азамат уақытша ұстау изоляторына қамалды», – деп мәлімдеді Алматы қаласы ПД криминалдық полиция басқармасының бастығы Қуатбек Науатов.
Мамандардың айтуынша, қазірдің өзінде полицейлерде ұсталған адамның осындай үш ұрлыққа қатысы бар екендігіне сенімді деректер бар. Сотқа дейінгі тергеу аяқталғанға дейін жеңіл ақшаға әуесқойдың «қызметтік тізімі» толықтырылуы мүмкін.
