Өңірлік коммуникациялар қызметінде өткен баспасөз конференциясында «Қазәуеорманқорғау» РМК алматылық авиациялық бөлімшесінің басшысы Бекзат Байшалов биылғы өрт қаупі артатын маусымға дайындық пен орманды өрттен қорғау жұмысын қалай қолға алып жатқандарын баяндады, – деп хабарлайды aqshamnews.kz тілшісі.
Оның айтуынша, қазір олар өрт қаупінің алдын алу үшін жан-жақты дайындық жасауға кіріскен: мамандарды оқытып, тексеріс жасап, орманды барлап шығуға арналған авиацияны осыған әзірлеп жатыр.
Қыс мезгілінде авиациялық-өрт сөндіру қызметінің мамандары орман өртін сөндіру бойынша оқудан өтіп, емтихан тапсырып, тәжірибе жүзінде іс-қимылдарын пысықтады. Сондай-ақ орман иелерімен бірлескен кездесу өткізіп, өрт шыққан жағдайда жедел әрі үйлесімді әрекет етудің жолын бір-бірімен келісіп алған. Бекзат Байшаловтың айтынша, команда алдағы істейтін жұмыстарын әбден елек-екшеп алып, кез келген жағдайға даяр отыр екен.
«Біз барлық қызметкерді алдын ала оқытып, жаттықтырамыз, сонда олар қандай жағдайда болсын жылдам әрі сенімді қимылдайды. Әркім өз міндетін түсініп, күрделі жағдайда техникамен жұмыс істей алуы керек», - дейді ол.
Ол сондай-ақ өрт сөндіруге авиация да алдын ала даярлап алатынын айтты.
«Ұшақ пен тікұшақ қажет болғаннан кейін әуе компанияларымен келісімшарт та жасадық. Бұл адам бара алмайтын аймақтардағы өрт шыққан жерге жылдам жетуге мүмкіндік береді», - деп түсіндірді спикер.
Ұшақтар 424 сағат 54 минутқа, 2–3 класты тікұшақтар 337 сағат 55 минутқа, 1 класты тікұшақтар 96 сағат 31 минутқа жоспарланған. Маусым басталғанда өрт қаупі артатындықтан сақшылар орманды әуеден үзбей бақылай бастайды.
Қазір ең күрделі жағдай Іле өзені ауданында болып отыр. Мұнда жергілікті тұрғындар шаруашылыққа керек болып қалғаннан кейін бір жерді өртейді, содан өрт шығады кейде. Осындай 9 өрт тіркеліпті. Мекеменің мәліметінше, қазіргі кезде бақылау мен өрттің алдын алу жұмысы күшейтілген.