Алматы облысының Іле ауданындағы құс фабрикасы өртеніп, бір адам қаза тапты, - деп хабарлайды Аqshamnews.kz тілшісі.
Алматы облысының ТЖД мәліметінше, 28 шілдеде М.Түймебаев ауылында құс етінен тағам өнімдерін өндіретін кәсіпорынның асханасынан өрт шыққан. Оқиға орнына дереу қалалық және облыстық ТЖД құтқарушылары жұмылдырылған.
"Алғашқы бөлімшелер келген сәтте өрттің үлкен аумақты шарпығаны анықталды. Барлау барысында газ-түтіннен қорғау қызметінің бөлімшесі ер адамның мәйітін тапты. Ашық жалынды өшіруге 42 маман мен 14 техника жұмылдырылды. 450 шаршы метр аумақта өрт толығымен сөндірілді. Жақын маңдағы нысандарға оттың таралуына жол берілмеді", — деп хабарлады Алматы облысы ТЖД.
Қазір өрттің шығу себебі анықталып жатыр. Бұл дерек бойынша Алматы облысы Төтенше жағдайлар департаментінің анықтау бөлімі ҚК 292-бабы 2-бөлігі бойынша қылмыстық іс қозғады.