Алматы – Көкпек – Көктал – Шонжы трассасының 80-шақырымында болған жол-көлік оқиғасынан төрт адам көз жұмды, деп хабарлайды Аqshamnews.kz тілшісі облыстық ПД баспасөз қызметіне сілтеме жасап.
Алдын ала мәлімет бойынша, 5 желтоқсанда Audi A6 көлігінің жүргізушісі рөлге ие бола алмай, қарсы бағытқа шығып кеткен. Сол сәтте ол қарсы бағытта келе жатқан Nissan Cefiro автокөлігімен соқтығысқан.
«Жол апаты салдарынан екі көліктің де жүргізушілері мен екі жолаушы алған жарақаттарынан оқиға орнында қаза тапты. Тағы үш жолаушы түрлі дене жарақаттарымен ауруханаға жеткізілді», – делінген полиция ақпаратында.
Қазір аталған факті бойынша сотқа дейінгі тергеу жүргізіліп жатыр. Жол апатының барлық мән-жайы анықталып жатыр, істің барысы облыстық полиция департаменті басшылығының бақылауына алынған.