Алматы мемлекеттік бизнес колледжінің еріктілері «Аяла» әлеуметтік қызмет көрсету орталығында қайырымдылық бағытындағы «Жылулық» акциясын ұйымдастырды. Іс-шара колледждің менеджмент және маркетинг циклінің онкүндігі аясында өткізіліп, болашақ мамандардың кәсіби білімін әлеуметтік жауапкершілікпен ұштастыруды мақсат етті, – деп хабарлайды aqshamnews.kz тілшісі.
Акция барысында колледж ұжымы мен студенттері өз еріктерімен қаржылай қор жинап, мүмкіндігі шектеулі жандарға қажетті сыйлықтар, арнайы арбалар мен тәттілер табыстады. Сонымен қатар, еріктілер орталық тәрбиеленушілеріне концерттік бағдарлама ұсынып, жылы лебіздері мен шынайы көңіл-күйін сыйлады.
Мемлекет басшысы Қасым-Жомарт Тоқаев өз сөзінде:
«Қайырымдылық жасау – азаматтық жауапкершіліктің жарқын көрінісі. Мейірімді қоғам құру – баршамыздың ортақ міндетіміз», – деп атап өткен болатын.
Осы ұстанымды негізге алған колледж жастары игі істі нақты әрекетпен дәлелдеді.
Цикл жетекшісі, акция ұйымдастырушыларының бірі Оспанов Саят:
«Біз болашақ менеджерлер мен маркетологтарды тек кәсіби тұрғыда ғана емес, әлеуметтік жауапкершілігі жоғары тұлға ретінде тәрбиелеуді көздейміз. Бұл акция – студенттердің жүрек қалауымен жасалған шынайы бастама. Олар қайырымдылықтың тек сөз емес, іс екенін көрсетті», – деді.
Ал «Аяла» әлеуметтік қызмет көрсету орталығының директоры Лязат Нурхаметовна өз кезегінде ризашылығын білдіріп:
«Біздің орталыққа келіп, балаларға қуаныш сыйлағандарыңыз үшін алғыс айтамыз. Мұндай қолдау – тәрбиеленушілер үшін ғана емес, біз үшін де үлкен моральдық демеу. Жастардың мейірімділігі мен жанашырлығы – қоғамымыздың болашағына сенім ұялатады», – деп атап өтті.
Акция менеджмент және маркетинг циклінің онкүндігі аясында ұйымдастырылуы да ерекше мәнге ие. Себебі заманауи бизнес тек пайда табумен шектелмейді – ол әлеуметтік жауапкершілік қағидаттарына негізделуі тиіс. Болашақ мамандар қоғамға пайда әкелудің маңызын ерте түсінуі қажет.
Алматы мемлекеттік бизнес колледжінің еріктілері бұл жолы тағы бір маңызды қадам жасап, мейірімділік пен қамқорлықтың нақты үлгісін көрсетті. «Жылулық» акциясы – бір реттік шара емес, жастардың жүрегіндегі жанашырлықтың жалғасы.
Қайырымдылық – қоғамды біріктіретін құндылық. Ал осындай бастамалар саналы, жауапты әрі жүрегі кең ұрпақтың қалыптасып келе жатқанын дәлелдейді.