Алматы қаласында жастардың әскери-патриоттық рухын арттыруға бағытталған маңызды шаралардың бірі — «Жеңіс туы — ұрпақ қолында» атты қалалық әскери-эстафета жоғары деңгейде өтті, – деп хабарлайды aqshamnews.kz тілшісі.
Аталған сайыс Алматы мемлекеттік бизнес колледжі базасында ұйымдастырылып, қала колледждерінің 1-курс студенттерін бір алаңға тоғыстырды. Эстафетаға 7 колледждің командалары қатысып, өздерінің ептілігі мен дайындық деңгейін көрсетті.
Жарыс бағдарламасы бес кезеңнен тұрды. Қатысушылар Калашников автоматын жартылай бұзып-жинау, жалпы әскери қорғаныс жиынтығын кию, жараланған адамды зембілмен тасымалдау, пневматикалық мылтықпен нысана көздеу және оқжатарды оқпен жабдықтау сияқты тапсырмаларда бақ сынады. Әр кезең студенттердің тек физикалық дайындығын ғана емес, сонымен қатар шапшаңдық, жауапкершілік және командалық үйлесімділігін де талап етті.
Мемлекет басшысы Қасым-Жомарт Тоқаев өз сөздерінің бірінде: «Жастардың бойында отансүйгіштік қасиетті қалыптастыру — мемлекеттің басты міндеттерінің бірі. Елін сүйетін, жерін қорғайтын ұрпақ — Тәуелсіздіктің тірегі» деп атап өткен болатын. Бұл эстафета — дәл осы ұстанымның іс жүзіндегі көрінісі.
Алматы мемлекеттік бизнес колледжі директорының тәрбие ісі жөніндегі орынбасары Саят Қанатұлы: Біздің мақсатымыз — жастардың бойында патриоттық рухты қалыптастыру, әскери дайындыққа деген қызығушылығын арттыру. Осындай жарыстар арқылы студенттер тек жарысып қана қоймай, бір-бірінен үйренеді, шыңдалады. Бүгінгі қатысушылар — ертең ел қорғайтын азаматтар, — деп атап өтті.
Жарыс қорытындысы бойынша жеңімпаздар анықталып, арнайы дипломдармен марапатталды. І орынды Алматы мемлекеттік бизнес колледжі иеленсе, ІІ орын Алматы мемлекеттік туризм және қонақжайлылық индустриясы колледжі командасына бұйырды. Ал ІІІ орынды Алматы сән және қызмет көрсету саласы колледжі қанжығасына байлады.
Қазылар алқасының мүшесі, Алматы мемлекеттік туризм және қонақжайлылық индустриясы колледжі алғашқы әскери және технологиялық дайындық пәнінің ұйымдастырушы-оқытушысы, аға лейтенант Қайсария Науқанов өз пікірінде: Студенттердің дайындық деңгейі жақсы. Әсіресе командалық жұмыс пен тәртіпке ерекше мән берілгені көрінеді. Мұндай жарыстар жастарды төзімділікке, жылдам шешім қабылдауға және жауапкершілікке үйретеді, — деді.
Айта кетейік, мұндай әскери-спорттық шаралар жас ұрпақтың бойында патриоттық сезімді нығайтып қана қоймай, олардың физикалық және моральдық тұрғыдан шыңдалуына үлкен үлес қосады. «Жеңіс туы — ұрпақ қолында» эстафетасы — ел болашағы саналатын жастардың жауапкершілігі мен дайындығын көрсеткен тағылымы мол іс-шара болды.