«Митральды жеткіліксіздікті транскатетерлік емдеудің заманауи тәсілдері. DragonFly™ жүйесі» атты мастер-класс барысында Кардиология және ішкі аурулар ғылыми-зерттеу институтының интервенциялық кардиологтары халықаралық мамандармен бірлесіп хирургиялық қауіптілігі жоғары 71 жастағы науқасқа митральды қақпақшаның қызметін қалпына келтіру бойынша операция жасады.
Пациент ауыр митралдық жеткіліксіздігіне және стенокардияға, 1-дәрежелі артериялық гипертонияға, инсулинге тәуелді қант диабетіне, диабеттік полинейропатияға, миокард инфарктіне шалдыққан. Оны жүрек соғуының жиілеуі және дұрыс жұмыс істемеуі, физикалық жүктеме кезінде демігу, аяғының ісінуі, жалпы әлсіздік, шаршағыштық мазалаған.
«Біз клиникалық практикаға жүрек-қан тамыр ауруларын емдеудің заманауи, ғылыми негізделген әдістерін енгізуге ұмтыламыз. Бұл технология ілеспе аурулары бар және операциядан кейінгі асқынулардың жоғары қаупіне байланысты «ашық» операция жасатуға жарамайтын пациенттер арасында Еуропаның жетекші клиникаларында жақсы нәтижесін көрсетті. Миниинвазивті операциялар ағзаға араласу көлемін және тіндердің зақымдану деңгейін барынша азайтуға мүмкіндік береді, пациенттердің тез қалпына келуіне және операциядан кейінгі кезеңнің қолайлы өтуіне ықпал етеді», – дейді Басқарма төрағасы Рүстем Төлеутаев.
Митральды қақпақшаны транскатетерлік жолмен қалпына келтірудің заманауи технологиялары бойынша мастер-класс барысында инновациялық DragonFly™ жүйесі қолданылды. Бұл - Қытайдағы «шетіне дейін» (TEER) принципімен митральды қақпақшаны транскатетерлік реконструкциялауға арналған алғашқы құрылғы және митральды жетіспеушілікті емдеудің клиникалық тұрғыда зерттелген интервенциялық әдісі.
Рентгенэндоваскулярлық операция блогының меңгерушісі Алексей Колесниковтың айтуынша, TEER-терапия — хирургиялық қауіптілігі жоғары науқастарда митральды қақпақша функциясын қалпына келтірудің халықаралық деңгейде мойындалған стандарты. DragonFly™ жүйесін қолдану Қазақстанда интервенциялық кардиологияны одан әрі дамытуға жаңа мүмкіндіктер ашады және митральды жетіспеушілікті минималды инвазивті әдістермен емдеудің қолжетімділігін арттырады.
Операция сәтті өтті. Пациент өзін жақсы сезінуде.
Мастер-класс барысында митральды қақпақша жетіспеушілігін диагностикалау және емдеудің өзекті тәсілдері ұсынылды, DragonFly™ жүйесінің конструкциялық ерекшеліктері көрсетілді, клиникалық жағдайлар және технологияны нақты тәжірибеде қолдану ерекшеліктері талқыланды. TEER технологиясының тиімділігін растайтын клиникалық деректерге шолу жасалды. Отандық және шетелдік мамандар тәжірибе алмасты.