Алматыда «Satbayev International Conference 2026: Климаттың өзгеруіне бейімделу және оның салдарын жұмсартуға арналған технологиялар мен инновациялар» атты конференция өтті, – деп хабарлайды aqshamnews.kz тілшісі.
Ғылым қызметкерлері күніне және көрнекті академик Қаныш Сәтбаевтың туған күніне орайластырылған форум Қазақстанның энергетикалық және экологиялық қауіпсіздігінің болашағын талқылайтын маңызды алаңға айналды.
Салтанатты іс-шара Қаныш Сәтбаев ескерткішіне гүл шоқтарын қою рәсімінен басталды. Жиын ашылуында сөз сөйлеген Алматы қаласы әкімінің орынбасары Абзал Нүкенов бүгінде ғылым теория ғана емес, қаланы дамытудың басты құралына айналып отырғанын атап өтті.
"Алматы еліміздің ең ірі ғылыми-білім беру және инновациялық орталығы ретінде танымал. Ғалымдарымыздың халықаралық деңгейдегі жетістіктері бүкіл Қазақстанның әлеуметтік-экономикалық дамуына тікелей әсер етеді. Қолданбалы ғылымды қолдау мақсатында әкімдік тарапынан 348 млн теңгеге грант бөлінді. Сонымен қатар, қала әкімдігі инновациялық идеяларды жүзеге асыруға жағдай жасай отырып, ғылым мен білім саласына алдағы уақытта да жан-жақты қолдау көрсетуге ниетті", – деді Абзал Нүкенов.
Форумның басты оқиғаларының бірі Satbayev University-дегі жаңа қуат көздерінің таныстырылымы болды. Әсіресе, «Жер асты суларын модельдеу» зертханасы көпшіліктің назарын аударды. Геология және мұнай-газ ісі институтының директоры Ерғали Әуелхан цифрлық технологиялардың қаланы ресурстармен қамтамасыз етуге және экологияны қорғауға қалай көмектесетінін айтып берді.
"Модельдеу ұзақ мерзімді болжам жасау үшін қажет. Егер біз су қорын 25 жылға бекітсек, күнделікті су алу кезінде оның деңгейі қалай өзгеретінін түсіну үшін дәл осы мерзімге 3D математикалық модель құрамыз", – деп түсіндірді ғалым.
Экологиялық инновациялардың практикалық қырларын университеттің бизнес-серіктестері таныстырды.
Еліміздің ірі өндіріс алпауыттарының қолдауымен ашылған жаңа зертханалар, сондай-ақ әкімдіктің қолданбалы гранттары Алматының «ақылды» және климаттық сын-қатерлерге төзімді мегаполиске айналуына берік негіз қалайды.
Жалпы, Қазақстанда мемлекеттік деңгейде ғылымды жүйелі қолдауға ерекше көңіл бөлініп отыр. Президент Қасым-Жомарт Тоқаев атап өткендей, «ғылымды дамыту — мемлекеттің стратегиялық басымдығы әрі бәсекеге қабілеттілігінің негізі». Бұл принциптер жаңартылған Конституцияда да көрініс тауып, онда ғылыми әлеуетті қолдау және ғылымды елдің тұрақты дамуының негізгі факторы ретінде дамыту үшін жағдай жасау туралы ережелер бекітілген.