Алматы әкімі Дархан Сатыбалды Гонконг Қытай бас сауда палатасының төрағасы, Sunwah Group басқарма төрағасы Цай Гуаньшэнмен кездесті, – деп хабарлайды aqshamnews.kz тілшісі.
Келіссөз барысында инвестициялық және сауда-экономикалық байланысты кеңейту мүмкіндіктері, сондай-ақ халықаралық компаниялар мен қаржы институттарымен әріптестікті дамыту жолдары талқыланды.
Алматы Қазақстан мен Орталық Азиядағы жетекші іскерлік әрі қаржы орталығы. Қалада елімізде жұмыс істейтін қытайлық компаниялардың шамамен 70 пайызы шоғырланған. Былтырғы жылдың қорытындысы бойынша Алматы мен Қытай арасындағы тауар айналымы 9,4 миллиард АҚШ долларына жетіп, 20 пайызға артты.
Кездесу барысында Гонконг іскерлік қауымдастығы қатысатын халықаралық бизнес-форум өткізу бастамасына ерекше назар аударылды. Қала басшысы аталған іс-шараны биыл қыркүйекте Алматыда ұйымдастыруды ұсынып, оған инвестициялық қорлар, қаржы институттары мен бизнес өкілдерін тарту қажеттігін атап өтті.
Сондай-ақ, бірлескен жобаларды жүзеге асыру үшін отандық компаниялар мен екінші деңгейлі банктердің қатысуын қамтамасыз етуге дайындық білдірілді.
Қытай тарапы құрылыс және инфрақұрылымдық жобалар, қаржы секторын дамыту, жасанды интеллект технологиясын енгізу, оның ішінде дрондар саласындағы шешімдер, сондай-ақ «жасыл» технология мен туризм бағыттарында ынтымақтастықты кеңейтуге қызығушылық танытатынын жеткізді.