Алматы дәрігерлері науқасқа екінші өмір сыйлады, – деп хабарлайды aqshamnews.kz тілшісі.
«Сіздер менің жұбайыма екінші өмір сыйладыңыздар» — дәл осы сөздермен науқастың жұбайы жедел медициналық жәрдем қызметі мен Алматы қалалық №7 клиникалық ауруханасының дәрігерлеріне алғысын білдірді. Дәл сол сын сағатта олардың кәсібилігі мен жедел әрекеті науқастың өмірін сақтап қалды.
Науқасты құтқаруға жедел медициналық жәрдем дәрігері Сейіл Алмабеков, сондай-ақ №7 қалалық клиникалық ауруханасының мамандары қатысты: интервенциялық хирургия бөлімшесінің меңгерушісі Сәкен Анартаев, интервенциялық кардиологтар Данияр Қайралиев, Мұхтар Нұрақбай және реанимация бөлімшесінің дәрігерлері.
Барлығы 103 қызметіне түскен шақыртудан басталды. Ер адам кеуде тұсындағы ауырсыну мен жайсыздыққа шағымданған. ЭКГ-да айқын өзгерістер болмағанына және науқастың жағдайы сырттай тұрақты көрінгеніне қарамастан, жедел жәрдем дәрігері Сейіл Алмабеков жедел коронарлық синдромға күдік келтіріп, шұғыл түрде ауруханаға жатқызу туралы шешім қабылдады.
Тасымалдау барысында науқастың жағдайы күрт нашарлап, жүрегі тоқтап қалды. Жедел жәрдем бригадасы дереу реанимациялық іс-шараларды бастап, жүрек қызметін қайта қалпына келтірді.
Науқас шұғыл түрде №7 қалалық клиникалық ауруханаға жеткізілді. Мұнда дәрігерлер оған коронарлық артериялардың көптамырлы ауыр зақымдануы аясында жедел миокард инфарктын анықтады. Интервенциялық кардиологтар жедел араласу жүргізіп, зақымданған тамырдағы қан ағымын қалпына келтірді.
Кейінгі емдеу бірнеше кезеңмен жалғасты. Мамандардың жоғары кәсібилігінің, заманауи технологиялардың және дұрыс таңдалған ем тактикасының арқасында жүректің қанмен қамтамасыз етілуі толық қалпына келтіріліп, науқас қалыпты өмірге оралды.
Қазақстандық дәрігерлер күн сайын дәлелдеп келеді: ең қиын жағдайлардың өзінде де жанында нағыз кәсіби мамандар болса, өмірді сақтап қалуға мүмкіндік бар.