Алматыдағы №2 Балалар қалалық клиникалық аурухана хирургтары тағы бір күрделі отаны сәтті жасап шықты, – деп хабарлайды aqshamnews.kz тілшісі.
Ауруханаға шұғыл түрде жеткізілген 12 жастағы қыздың асқазанынан ірі көлемде түйіншек болып қалған шаш – медицина тілімен айтқанда трихобезоар шықты.
Бұл отаның күрделі болған себебі, жасөспірімге дәл осы диагнозбен бұрын екі рет операция жасалған екен, біріншісі – 2021 жылы Шымкент қаласында, екіншісі – 2024 жылы Семейде. Кез келген қайта жасалған операцияларда кездесетіндей, іш қуысында жабысқақ процестің (спайка) дамуымен қатар, отдан кейінгі тыртықтар пайда болып, асқазан қабырғасы едәуір өзгерген. Сондықтан бұл операция асқан дәлдікті, үлкен тәуекелді, мүлт кетпеуді талап етеді.
Ал екінші аурухананың кәсіби дәрігерлері операцияны жоғары деңгейде орындады. Қазіргі күні науқастың жағдайы тұрақты деп бағалануда.