Алматы әкімі Дархан Сатыбалды Алатау ауданындағы «Нұркент» тұрғын үй кешенінің тұрғындарымен жүздесті. Кездесу барысында қала тұрғындары ауызсудың тапшылығы, электр қуатының жиі өшуі, сондай-ақ балабақша мен мектептегі орын жетіспеушілігі жайын көтерді.
Судың азайып кетуі Алатау ауданының батыс бөлігінде қарқынды жүргізіліп жатқан тұрғын үй құрылыстарымен байланысты. Қазіргі таңда «Нұркент» кешені ауыз суды «Қалқаман» сорғы бекетінен алады (тәулігіне 10 600 текше метр), алайда тұтыну көлемі шегіне таяп қалғандықтан, жаз мезгілінде су қысымы төмендеп, су беру жиі тоқтайды. Бұл түйткілді шешу үшін көршілес тұрғын үй кешеніндегі сорғы бекеті қалпына келтіріледі. Қалалық энергетика және сумен жабдықтау басқармасының мәліметінше, құрылыс компаниясы нысанға күрделі жөндеу жүргізіп, тұрғындарды үздіксіз ауызсумен қамтуға мүмкіндік жасайды. Жөндеу жұмыстары 25 қыркүйекке дейін аяқталып, нысан «Алматы Су» ШЖҚ МКК балансына беріледі.
Электр қуатымен қамтудың үзілуі жеті трансформаторлық қосалқы станцияның «Алатау Жарық Компаниясы» АҚ балансына берілмеуінен туындаған. Әкім бұл мәселені жедел шешіп, тұрақты электрмен қамтуды қамтамасыз етуді тапсырды.
Тұрғындар ретсіз қойылған автокөліктер мен тазалықтың сақталмауына қатысты шағым айтты. Дархан Сатыбалдының айтуынша, аталған автотұрақ орналасқан жер телімі мемлекет меншігіне қайтарылып, оның орнына жаңа балабақша бой көтереді. Сондай-ақ, тұрғындар аулалардың жөнделмегендігі мен рұқсатсыз қоқыс тастайтын орындардың барын жеткізді. Әкім аудан әкімдігіне аулаларды абаттандырып, санитарлық жағдайды тұрақты бақылауда ұстауды тапсырды.
«Бүгін айтылған барлық мәселе хаттамаға енгізілді. Орындалуын өзім қадағалаймын. 25 қыркүйекке дейін жөнделген сорғы бекеті «Алматы Су» балансына, ал электр желілері «Алатау Жарық Компаниясының» иелігіне беріледі. Аула абаттандырылып, балабақша салынады. Қалған мәселелер де жұмыс тәртібімен шешімін табады», – деді Дархан Сатыбалды.