Алматы әкімі Дархан Сатыбалды Алатау ауданына жұмыс сапары барысында Алғабас шағынауданының тұрғындарымен кездесті.
Қала басшысы кездесуге келген барлық тұрғынның өтінішін тыңдады.
Шағынаудан тұрғындары орталық кәріз жүйесіне қосылу, жарықтың жиі сөнуі, жол жөндеу жұмыстарының аяқталуы және ойын алаңдарының жоқтығы туралы мәселелерді көтерді.
Энергетика және сумен жабдықтау басқармасы басшысының міндетін атқарушы Нұрбақыт Серікбай баяндағандай, шағынауданда 19,9 шақырым су құбыры және 27,3 шақырым кәріз желілерін тарту аяқталды.
Жобаны жүзеге асыру 584 жеке үйді немесе 4 мыңға жуық адамды орталық желілермен қамтамасыз етуге мүмкіндік берді. Кәріз желілерін толық іске қосу үшін басқарма сорғы станциясын салып жатыр. Нысан келесі жылдың басында пайдалануға берілмек.
Сондай-ақ, тұрғындарды электр жарығымен тұрақты қамтамасыз ету үшін 70 шақырым желі салынып, 31 трансформатор орнатылды.
Қаланың мобилділік басқармасының басшысы Сағындық Телібаев бүгінде шағынауданда 31 шақырым жолға асфальт төселгенін және қалған 900 шақырым жолда тиісті жұмыстардың жүргізіліп жатқанын айтты.
«Асфальттың жоғарғы қабатын төсеу және жол белгілерді орнату сияқты барлық жұмыс қыркүйекке дейін аяқталуға тиіс. Келесі жылдың басында сорғы станциясының құрылысы аяқталған соң барлық үй орталық кәріз жүйесіне қосылады. Біз қазір құрылыс мерзімін хаттамаға енгіздік, оның орындалуын жіті бақылауыма аламын», - деді Дархан Сатыбалды.
Бұған қоса, қала басшысы Алатау ауданының әкімі Талғат Малыбаевқа шағынауданда санитарлық тазалықты күшейту, балалар алаңдарын салу мүмкіндігін қарастыру және инфрақұрылымдық нысандардың белгіленген мерзімде аяқталуын қамтамасыз етуді жүктеді.