Алматы әкімдігінде адамдарды өрттен құтқарған қала тұрғыны марапатталды, - деп хабарлайды aqshamnews.kz тілшісі.
Алматы әкімдігінде адамдарды өрт кезінде құтқарып қалған қала тұрғыны Асыл Ахметовке ерлігі үшін құрмет көрсетіліп, ақшалай сыйақы табысталды.
"Еңбегімді елеп, құрмет көрсетіп жатқандарыңыз үшін алғысым шексіз. Бұл – мен үшін үлкен мәртебе. Қиын жағдайға тап болған жандарға көмек көрсетуді азаматтық борышым деп білемін. Бұл әрекетімді марапат үшін емес, адами парызым ретінде жасадым. Менің орнымда кез келген адам дәл солай істер еді деп ойлаймын", – деді Асыл Ахметов.
Айта кетейік, әлеуметтік желіде ер адамның төртінші қабатқа дейін өрмелеп шығып, өртті сөндіргені бейнеленген видео тарады.
4 маусымда сағат 17:07-де Наурызбай ауданында Жүнісов көшесі, 2/23 үй ("Алма Сити") мекенжайы бойынша он қабатты тұрғын үйдің төртінші қабатындағы пәтердің балконында қоқыс өртенген. Өртсөндірушілер келгенге дейін сол маңнан өтіп бара жатқан Асыл Ахметов өртті сөндірген.