Оңтүстік-Шығыс Азияның миллиондаған тұрғыны Алматыны AirAsia әуе компаниясының жаңа халықаралық жарнамалық науқаны арқылы танып, білетін болады, – деп хабарлайды aqshamnews.kz тілшісі.
Бұл туралы Алматы қаласының Туризм басқармасының өкілдері айтты.
Азиядағы жетекші лоукостерлердің бірі қаланың туристік әлеуетіне арналған промороликтер сериясын түсіруге кірісті.
Бейнероликтерде Алматының табиғи көрінісі, көрнекті орындары, заманауи қалалық инфрақұрылымы және Қазақстанның ең ірі мегаполисіне тән ерекше атмосферасы көрсетіледі. Контент AirAsia-ның әлеуметтік желілерінде, цифрлық медиаплатформаларында және сыртқы цифрлық жарнама алаңдарында (DOOH – Digital Out-of-Home), соның ішінде Куала-Лумпур қаласындағы LED-экрандарда таратылады.
AirAsia бейнеконтентті әзірлеу, оны цифрлық арналарда ілгерілету және сыртқы цифрлық жарнама құралдарында орналастыру шығынын толықтай өз мойнына алады. Мұндай ынтымақтастық форматы бюджет қаражатын тартпай-ақ Алматының әлеуетті туристер арасындағы танымалдылығын арттырып, қаланы халықаралық туристік нарықта тиімді ілгерілетуге мүмкіндік береді.
Алматы үшін бұл жоба Оңтүстік-Шығыс Азияның туристік нарығымен ынтымақтастықты дамытудағы кезекті маңызды қадам болмақ әрі жаңа туристік аудиторияның қызығушылығын арттыруға ықпал етеді. Бұған әуе қатынасының кеңеюі де оң әсерін тигізуде. Қазіргі таңда AirAsia Алматыдан Куала-Лумпурға аптасына бес рет, ал Бангкокқа аптасына төрт рет тікелей рейс орындайды. Жазғы маусымдағы сұраныстың артуына байланысты Бангкок бағыты бойынша рейс саны беске дейін ұлғайтылады. Әуе қатынасын кеңейту мен халықаралық жарнамалық науқанды қатар жүзеге асыру Алматыға келетін туристер санын арттыруға қосымша мүмкіндік береді.