Алматы №4 қалалық клиникалық ауруханаға 1929 жылы туған Елена Нейфельд ауыр халде жеткізілді. Мұндай жаста аяқ сүйектерінің ашық әрі күрделі сынуы көбіне тірек-қимыл қабілетінің жоғалуына, ұзақ уақыт қозғалыссыз жатуға әкелетіні белгілі. Дәрігерлер басты мақсатты - науқастың қайта жүріп кетуіне мүмкіндік беруді айқындап алды.
Науқастың жағдайы анестезиология, реанимация және қарқынды терапия бөлімінің меңгерушісі мен травматолог-ортопед дәрігерлердің қатысуымен өткен көпбейінді консилиумда жан-жақты талқыланды. Қауіп жоғары болғанына қарамастан, медициналық команда ота жасау жөнінде ортақ шешімге келді.
Ота екі кезеңде жүргізілді. Алдымен хирург мамандар жараны мұқият тазалап, тіршілікке қабілетсіз тінді алып тастап, жұмсақ тінге пластика жасады. Кейін сүйекке Илизаров аппараты арқылы сүйекаралық остеосинтез жүргізілді. Бұл құрылғы сүйекті берік бекітіп, олардың дұрыс әрі сапалы бітуіне жағдай жасайды. Ота 2 сағат 45 минутқа созылды, - деп хабарлайды Aqshamnews.kz.
Ота жасаған бригада құрамында: хирург - Руслан Розиев; хирург ассистенттері - Талғат Бижанов, резидент Бақыт Қорқыт, Дінмұхаммед Абдулдаев;
анестезиолог - Ертуған Тоқтарбаев; оталық медбике - Гүлмира Алдашова болды.
Қазір Елена Яковлевна үйінде. Жарасының жазылуы жақсы, сүйектер дұрыс бекітілген. Ең бастысы - оның қайтадан аяғынан тұрып, оңалту кезеңін бастауына нақты мүмкіндік бар.
Дәрігерлердің айтуынша, жақындарының қамқорлығы мен жүйелі жаттығудың арқасында ол таяқ немесе жүріс құралын пайдаланып та, өздігінен де қозғала алады.
«Жас - үкім емес. Біз әрдайым нақты жағдайға қарап, көмектесудің жолын іздейміз. Басты мақсат - аяқты сақтап қалып, адамға қозғалу мүмкіндігін қайтару болды. Қазір бәрі ойдағыдай өтіп жатыр. Бұл - біз үшін үлкен жеңіс», - дейді №4 ҚКА травматологы Руслан Розиев.
Алматы №4 ҚКА дәрігерлері ең күрделі, үміті аз жағдайдың өзінде кәсібилік пен табандылық шешуші рөл атқаратынын тағы бір мәрте дәлелдеді.
№4 ҚКА - жыл сайын ауыр жарақат алған және күрделі дертке шалдыққан жүздеген науқасқа көмек көрсететін ірі көпбейінді стационар.