Өткен жылғы оқушылар арасындағы зияткерлік жарыстардың қорытындысы Алматының республикалық деңгейдегі тұрақты көшбасшылығын тағы бір мәрте дәлелдеді. Бұл туралы қалалық Білім басқармасы 2025 жылдың жұмыс қорытындысын жариялау барысында айтты.
Қала құрамасы қатарынан 23-ші рет Қазақстанның үздік олимпиадалық командасы атанып, жалпыкомандалық есепте тағы да бірінші орын иеленді. Жыл қорытындысы бойынша жаратылыстану-математикалық бағыттағы жүлделі орындар саны 37-ден 41-ге дейін артты. Ал қоғамдық-гуманитарлық бағытта Алматы командасы Бас жүлдені жеңіп алды.
2025 жылы халықаралық олимпиадаларда 538 жүлдегер дайындалды. Ведомство мәліметінше, қатысушылар құрамын тиімді реттеу барысында ең мықты оқушыларды сапалы даярлау мен атаулы қолдауға басымдық берілген. Халықаралық жарыстарға 670 оқушы қатысып, олардың 538-і жүлдегер атанды. Республикалық олимпиадаларда 600 оқушы бақ сынап, 335-і жеңімпаз болды.
Бұқаралық спорт саласында да оң динамика байқалды. Қалалық спорттық іс-шараларға 153 мыңнан астам оқушы қатысып, республикалық деңгейдегі жеңістер саны артты. Әскери-патриоттық тәрбие бағытында да жоғары нәтиже тіркелді.
Алматы мектептері мен құрама командалары дәстүрлі түрде ұлттық және халықаралық жарыстардың көшбасшылары қатарында. Оқушылар Ұлттық мектеп лигасы, WorldSkills чемпионаты, инклюзивті спартакиадалар, пәндік олимпиадалар және тоғызқұмалақтан әлемдік біріншіліктерге дейін қатысып келеді. Мәселен, Алматыдағы сегіз арнайы мектеп-интернаттың оқушылары «Жұлдызай-2025» ұлттық инклюзивті ойындарында бірінші орынға ие болып, республикалық және халықаралық жарыстардың жүлдегері атанды.