Түркістан облысындағы алапат өрттен аман қалған баланың жағдайы өте ауыр. Ал екі ересек адамның аз да болса беті бері қараған, - деп хабарлайды aqshamnews.kz тілшісі ktk.kz-ке сілтеме жасап.
"Бүгінде екі ересек адамның жағдайы тұрақты. Зардап шеккендер Шымкентке жеткізіліп, оларға көмек көрсетіліп жатыр. Дегенмен баланың жағдайы өте ауыр. Мамандар кеңес беріп, ем-домын түзетіп, баланың жағдайын бағалап отыр. Денсаулық сақтау министрлігі жағдайды қадағалап отыр", - деді денсаулық сақтау вице-министрі Тимур Сұлтанғазиев.
Жетісай ауданының Алғабас ауылындағы өрт өткен сейсенбі күні болған. Екі қабатты үйде тұтанған өрт 12 адамның өмірін жалмаған еді. Оның тоғызы - бала. Ағайынды жігіттер бала-шағасымен тойдан келіп шырт ұйқыға кеткен беті екен. Өртсөндірушілер бірінші ес-түссіз жатқан үш адамды құтқарып, ауруханаға жеткізді. Аман қалған екі ересек адамның қазіргі жағдайы тұрақты. Ал кішкентай бала хәл үстінде. Оған көмек көрсету үшін Алматыдан арнайы жоғары білікті мамандар шақырылыпты.
