Алматының әлеуметтік дамуы қала үшін басым бағыт болып қала береді. Бұл туралы Орталық коммуникациялар қызметінің алаңында өткен брифинг барысында мегаполис әкімі Дархан Сатыбалды мәлімдеді.
Қаланың өркендеуі тек экономикалық көрсеткіштермен емес, ең алдымен халықтың өмір сүру сапасымен өлшенеді. Осы тұрғыдан алғанда, әлеуметтік даму – қала тұрғындарының әл-ауқатын арттырудың басты тетігі.
Білім беру, денсаулық сақтау, мәдениет, әлеуметтік қамсыздандыру сияқты салалардың дамуы – әрбір адамның күнделікті өмірімен тікелей байланысты. Балалардың сапалы білім алуы, тұрғындардың қолжетімді медицинаға жүгінуі, көпбалалы отбасылар мен қарттардың әлеуметтік қорғалуы – бұның бәрі қалада әлеуметтік теңдік пен тұрақтылықты қалыптастырады.
Әлеуметтік инфрақұрылымды жаңарту, жаңа мектептер мен ауруханалар салу, балабақша орындарын көбейту, қоғамдық көлікті жетілдіру – тұрғындардың өмір сүруіне қолайлы жағдай жасап, оларға жайлы орта қалыптастырады. Бұл тек тұрмыстық деңгейде ғана емес, азаматтардың болашаққа сеніммен қарауына, қоғамдағы белсенділігі мен жауапкершілігінің артуына да ықпал етеді. Сондықтан әлеуметтік даму – тек әкімшілік мақсат емес, ол – халықтың жүрегіне жол табатын ең маңызды стратегиялық басымдық.
Дархан Сатыбалдының айтуынша, Алматыда білім беру және медициналық мекемелер желісін кеңейту бойынша жүйелі жұмыс жалғасып жатыр. Жақын уақытта 16 жаңа балабақшаны пайдалануға беру жоспарланып отыр. Сонымен қатар жекеменшік балабақшаларда 10 000 қосымша орын ашуға мемлекеттік тапсырыс бар. Аталған шаралар 2030 жылға қарай 2-6 жас аралығындағы балаларды мектепке дейінгі біліммен қамтуды 99 пайызға жеткізуге мүмкіндік береді. Сондай-ақ «Алматы мектеп стандартына» сәйкес, оқушы орындарының тапшылығын кезең-кезеңімен азайту мақсатында алдағы 5 жылда 16 мектеп пен 7 қосымша ғимарат салу көзделген.
«Денсаулық сақтау саласында бірыңғай стандартқа сәйкес қаладағы 475 мың тұрғынды медициналық қызметпен қамтитын медициналық-санитарлық алғашқы көмек көрсететін 11 нысан салынады. Сонымен қатар 3 перзентхананың, 2 заманауи стационардың, сондай-ақ 250 орынға арналған хоспис пен СПИД орталығының құрылысы басталады. Медициналық инфрақұрылымды жаңғырту мақсатында 4 негізгі стационар мен 2 клиникалық ауруханаға ауқымды қайта жаңғырту жұмыстары жүргізіледі. Бұдан бөлек, 1,5 млн тұрғынды қамтитын 16 қосымша жедел медициналық жәрдем станциясы салынады», – деді Дархан Сатыбалды.
Қаланың әлеуметтік дамуы – тұрғындардың күнделікті өмір сапасының басты көреткіші. Әлеуметтік салаға жұмсалған әрбір инвестиция – тұрғындардың денсаулығы мен болашағына бағытталған қадам. Білім мен медицинаға, мәдениет пен әлеуметтік қолдауға басымдық беру әр азаматтың өзін қауіпсіз, бағалы әрі қажет сезінуіне жол ашады. Сондықтан да әлеуметтік даму тұрақты, өркениетті қоғамның негізі болып қала береді.