Динозаврдың сүйегін америкалық жеке коллекционер алды
Парижде өткен бәссаудада әлемдегі ең үлкен трицератопстің қаңқасы сатылды. Үлкен Джон деп аталатын бұл қаңқаны америкалық жеке коллекционер 6,6 млн еуроға сатып алды, деп хабарлайды Almaty-akshamy.kz «МИР24» телеарнасына сілтеме жасап.
Қаңқаның үлкен Джон деп аталуына келсек, ол табылған жер сол Джон деген кісіге тиесілі болған. Кейін қаңқаға соның аты беріліпті.
Үшмүйізді динзаврдың үлкендігі сондай, тіптен Гиннестер кітабына ең үлкен трицератопстің қаңқасы ретінде еніпті. Оның ұзындығы 7,15 метр, ал биіктігі 2,7 метр. Ал, басы денесінің үштен бірін алып жатыр. Екі мүйізінің ұзындығы 1,1 метрге жетеді.
Сарапшылар бәссауда барысында Үлкен Джонға бар болғаны 1,2 млн-нан 1,5 млн еуро ұсынылады деп болжапты. Бәссауда ұйымдастырушыларының айтуынша, динозавр қаңқасының 6,6 млн еуроға сатылуы рекорд болған. Оны есімін құпия қалдыруды өтінген америкалық жеке коллекционер сатып алған.