Қарақалпақстан астанасы Нүкіс қаласындағы «Оқ куш» кешенінде салынған киіз үй қозғалмайтын киіз үй ретінде Гиннестің рекордтар кітабына енгізілген.
Жақында Өзбекстан президенті ол жерде кәсіпкерлермен диалог өткізген болатын. Құрылымның диаметрі 40,5 метрді құрайды, деп хабарлайды aqshamnews.kz.
22 тамызда Гиннестің рекордтар кітабы өкілдерінің сертификат табыстау рәсімі өтті. Оған Қарақалпақстан Жоқарғы Кеңесінің төрағасы Аманбай Орынбаев, Қарақалпақстан Президентінің Арал өңірін тұрақты дамыту жөніндегі кеңесшісі Тұрсынхан Худайбергенов және басқалар қатысты. Биіктігі 22 метрлік құрылысты «Orol Agro» компаниясы тұрғызған.
20 тамызда осы киіз үйде Өзбекстан президенті Шавкат Мирзиёев пен кәсіпкерлердің жыл сайынғы диалогы өтті. Мұнда түрлі мәдени шаралар мен форумдар өткізу жоспарланған.