Энергетика министрлігі атом энергетикасы және өнеркәсібі департаментінің директоры Жаслан Қасенов Орталық коммуникациялар қызметінде өткен брифингте атом энергетикасын дамытып жатқан елдер туралы ақпарат берді.
Оның айтуынша, қазіргі уақытта әлемде 31 мемлекет атом электр станциясын (АЭС) пайдаланып отыр. 2022 жылғы ақпандағы жағдай бойынша, әлемде жалпы қуаты шамамен 391 ГВт болатын 439 энергетикалық реактор бар, сондай-ақ 55 ГВт қуаты бар тағы 52 реактор салынып жатыр.
Атом энергетикасын айтарлықтай қолданып отырған елдер қатарында АҚШ, Франция, Қытай, Жапония, Ресей және Оңтүстік Корея бар. Бұл елдердің әрқайсысында 25 ГВт-тан астам қуаттылық бар. Канада мен Украинада шамамен 13 ГВт, ал Ұлыбритания, Германия, Швеция, Испания, Үндістан және Бельгияда шамамен 5-10 ГВт энергия беріп тұрған АЭС орнатылған. Тағы 18 елде әрқайсысы 0,4 - 4 ГВт дәлізінде белгіленген қуаты бар бір немесе бірнеше реактор бар.
Сонымен қатар, Жаслан Қасенов атом энергетикасына бет бұрған елдердің картасы алты құрлықты бірдей қамтитынын атап өтті. Мысалы, Франция он жыл ойланып, ядролық энергетикаға сенім артатын болып, 14 жаңа реактор орнатуды жоспарлап отыр, олардың біріншісі 2035 жылға қарай іске қосылады. Түркия, Біріккен Араб Әмірліктері, Беларусь сияқты елдер өз тарихында алғаш рет АЭС салып жатыр. Бұрын АЭС-тен бас тартқан Польша қазір атомдық энергетикалық бағдарламасын жаңартуға дайындалуда.
Африка мен Таяу Шығыс елдері де АЭС салуға қызығушылық танытып отыр. Еуропалық комиссия да Еуропалық Одақ мүшелеріне 2050 жылға қарай көміртегі бейтараптығына көшу бағдарламасына атом энергетикасын қосу жоспарланған қаулы жобасын ұсынды.