Кәсіпқой бокстан аса ауыр салмақта өнер көрсететін украиналық Александр Усик Эр-Риядта (Сауд Арабиясы) өткен бокс кешінде британдық Тайсон Фьюриді жеңіп, әлемнің абсолютті чемпионы атанды, деп хабарлайды аlmaty-akshamy.kz.
12 раундқа жоспарланған жекпе-жек соңына дейін болды. Десе де, тоғызыншы раундта Усик қарсыласына ауыр соққылар сериясын дарытып, рефери нокдаун ашты.
Жекпе-жек нәтижесінде екі төреші жеңісті украиналыққа берсе, біреуі Фьюри жеңді деп санаған.
Осылайша, Александр Усик кәсіпқой бокстағы 22 жеңісіне қол жеткізді. Оның 14-ін ол нокаутпен жеңген. Ал, Тайсон Фьюри болса мансабында бірінші рет жеңіліп отыр. Оның еншісінде 34 жеңіс пен бір тең ойын бар.
Британдық боксшы матч-реванш өткізуге құқығы бар және бұл қарымта ойын биыл жыл соңында болуы мүмкін.