«Алатау-Ақпарат» ЖШС мен «Қызылжар-Ақпарат» ЖШС өзара ынтымақтастық және түсіністік туралы меморандумға қол қойып, аймақтық басылымдар арасындағы әріптестікті нығайтуға уағдаласты, деп хабарлайды Aqshamnews.kz тілшісі.
Алматы қаласы мен Қызылжар өңірінің медиақұрылымдары арасында ынтымақтастық туралы меморандум жасалды. Құжатқа «Almaty aqshamy», «Вечерняя Алматы» газеттері мен aqshamnews.kz, vecher.kz порталдарын біріктіретін «Алатау-Ақпарат» ЖШС және құрамына «Soltüstık Qazaqstan», «Qyzyljar nūry» газеттері мен qyzyljarnews.kz порталы кіретін «Қызылжар-Ақпарат» ЖШС қол қойды.
Тараптар ұзақмерзімді, тиімді әрі өзара пайдалы әріптестік орнатуға келісті. Кездесу барысында аймақтық басылымдар арасындағы тәжірибе алмасудың маңызы, медианың қазіргі дамуы, жаңа трендтер мен трансформация үдерістері талқыланды.
«Алатау-Ақпарат» ЖШС директоры Ержан Қалымбайұлы мұндай меморандумдар барлық өңірлік басылымдар арасында жасалса, өзара тәжірибе алмасуға үлкен мүмкіндік беретінін айтты. Оның сөзінше, бүгінде кейбір аймақтық газеттер таралым жағынан қиындық көріп отыр. Сондықтан бұл бағытта қалыптасқан жақсы тәжірибелерді бөлісу маңызды.
Сондай-ақ кездесу аясында Ержан Қалымбайұлы «Қызылжар-Ақпарат» ЖШС ұжымымен жүздесіп, медиа саласының дамуы, қазіргі трендтер мен трансформацияларға қатысты сауалдарға жауап берді.