Талдықорғанда Жетісу облысының қылмыстық істер жөніндегі мамандандырылған ауданаралық соты Ақсу ауданының тұрғыны Айзат Жұманованың өліміне қатысты істі қарап, үкім шығарды, деп хабарлайды Aqshamnews.kz тілшісі.
Сотта марқұмның жұбайы Айбар Жанболат ҚР ҚК 99-бабы 1-бөлігі («Адам өлтіру») бойынша айыпталды. Соттың анықтауынша, 2025 жылғы 22 маусымға қараған түні айыпталушы мас күйде жәбірленушіні үй ауласынан шығарып, соққы жасаған. Әйел алған жарақаттарынан кейін медициналық мекемеде көз жұмған.
Айыпталушының кінәсі сот сараптамаларының қорытындыларымен, куәгерлердің жауаптарымен, тергеу әрекеттері хаттамаларымен және қылмыстық іс материалдарымен дәлелденген. Сот оның бұрын сотталмағанын және кінәні ішінара мойындағанын ескергенімен, қылмысты алкогольдік мас күйде жасауы ауырлататын мән-жай ретінде танылды.
Нәтижесінде сот Айбар Жанболатты кінәлі деп танып, 14 жылға бас бостандығынан айыру жазасын тағайындады. Ол жазасын орташа қауіпсіздік мекемесінде өтейді. Айта кетейік, прокурор бұған дейін айыпталушыға 15 жыл сұраған. Үкім әзірге заңды күшіне енген жоқ.
