«Біртұтас тәрбие» бағдарламасының аясында Түрксіб ауданының №59 мектеп-гимназиясында мектепішілік театр ашылды. «Театр – өмірдің айнасы» демекші, мектеп театрының негізгі көрермендері оқушылар мен ұстаздар, ата-аналар болғандықтан мектеп театры «Айна» деген атауға ие болды.
Театрдың жұмысы ақиық ақыны Мұқағали Мақатаевтың «Аққулар ұйықтағанда» поэмасының желісінде жазылған пьесалық қойылымммен басталды.
Оқушылардың сахнадағы шынайы бейнесін көрген көрермендер де көздеріне жас алды. Бұл балалардың ақынның шығармасын түсініп, түйсіне білгенін көрсетсе керек. Қойылым барысында рухани, адамгершілік құндылықтарды оқушының бойына театр арқылы дарытуға болатынын байқадық. Сахналық қойылым бала тәрбиесіндегі таптырмайтын ерекше тәрбие әдісі екенін дәлелдеді. Сахнада атақты өнер иелерінің ізбасарлары өсіп келе жатқанын байқадық. Бүгінгі аумалы –төкпелі уақытта мектеп оқушыларын шынайы рухани байлыққа, ұлттық құндылықтарға үйретемін деген жанға өнегені өнерден бастаған абзал дегіміз келеді.
Мектебіміздің қазақ тілі мен әдебиеті пәнінің мұғалімі Бақыт Ақатқызы жетекшілік еткен «Айна» мектепішілік театры әлі талай сахнада қазақ өнерін дамытуға атсалысады деген ойдамыз.
