Қақаған аяз кезінде Щучинск қаласының Институт шағын ауданы қазандықтағы апат салдарынан жылусыз қалды, деп хабарлайды Aqshamnews.kz тілшісі.
Қаладағы №20 қызметтік қазандықтың істен шығуына байланысты төтенше жағдай тіркеліп, коммуналдық қызметтер жылу беруді уақытша тоқтатуға мәжбүр болған. Соның салдарынан бірнеше тұрғын үй жылудан ажырап, тұрғындар суықта қалды.
Оқиғаға байланысты Бурабай ауданының әкімі Арай Садықов әлеуметтік желі арқылы тұрғындарға үндеу жасап, жағдайға түсіністік танытуды сұрады.
«Құрметті Щучинск қаласы, Бурабай ауданының тұрғындары! Бүгін №20 қызметтік қазандықта апатты жағдай орын алды. Осыған байланысты Институт шағын ауданына жылу беру уақытша тоқтатылды. Қазіргі таңда барлық күш-жігер апатты жоюға бағытталды», – деп жазды аудан әкімі.
Әкімнің айтуынша, жөндеу жұмыстары тәулік бойы жүргізіліп жатыр. Мамандар ақауды мүмкіндігінше қысқа мерзімде қалпына келтіруге күш салуда. Сондай-ақ аудан басшысы жағдайдың бақылауда екенін айтып, апат салдары жақын уақытта жойылып, жылу беру қайта іске қосылатынын жеткізді.
