Жуырда әлеуметтік желіде Алматы қаласының орталық көшелерінің бірінде патрульдік полиция қызметкерінің мопед айдаған шетелдік азаматпен ағылшын тілінде сөйлескен видеосы тарады. Көпшілік бұл сәтті ерекше жылы қабылдап, тәртіп сақшысының біліктілігі мен сыпайылығына жоғары баға берді. Бұл оқиғаның мән-жайын Aqshamnews.kz тілшісі анықтап көрді.
Бейнежазбада полиция капитаны өзін қызметтік этикетке сай таныстырып:
– Саулығыңызды тілеймін, полиция капитаны Сейсенбаев, – деп шетелдік азаматқа жақындайды. Алайда мопед жүргізушісі:
– Sorry! I don’t speak Russian, – деп, орыс тілінде сөйлей алмайтынын жеткізеді.
Полиция қызметкері еш тосылмай, ағылшын тілінде еркін диалог құрып кетеді. Турист өзін Алекс деп таныстырып, Италиялық екенін, Австралиядан келе жатқанын және 10 шақты елді аралағанын айтып береді. Алдағы бағыты – Ресей екен.
– Біздің еліміз туралы не ойлайсыз? – деген сұраққа шетелдік:
– Өте әдемі, маған бұл мемлекет ұнайды, – деп жауап береді.
Капитан Сейсенбаев оған қажетті жағдайда «102» нөміріне хабарласуға болатынын айтып, қоштасады. Ағылшын тілінде еркін сөйлеген полиция қызметкері бұл әрекеті арқылы сыпайылықтың да үлгісін де танытқандай.
Видео әлеуметтік желіде кеңінен тарап, желі қолданушылары бұл көрініске тамсана пікір қалдырды:
«Жарайсың! Жігітке жеті өнер де аз»,
«Басқа планетаның полицейі шығар)))»,
«Қазақстанда да осындай қызметкер бар екеніне сенгім келеді»,
«Арнайы түсірілген шығар»,
«Жарайсың! Мектепте ағылшын тілін жақсы оқыған ғой деймін» – деп жарыса жазды қолданушылар.
Бұл жағдайдың анық-қанығын білу мақсатында біз полиция капитаны Нұрболсын Сейсенбаевқа хабарластық. Ол оқиғаның шынайы екенін растады. Ағылшын тілін қайдан меңгергенін сұрайық дегенімізде:
– Жұмыс барысында кез келген жағдай болуы мүмкін. Қазір қызмет барысындамын, уақытым тығыз, – деп қысқа қайырды.
Қалай болғанда да, бұл оқиға – полиция имиджіне оң әсер етіп, халықтың сенімін арттырған жарқын мысалға айналды.