АЭС салуды қолдау жөніндегі Халық штабы өңірлерде тұрғындармен кездесуді жалғастырып жатыр. Бүгін Көкшетауда штаб мүшелері құтқарушылармен, еңбек ұжымдарымен, медицина саласының қызметкерлерімен және ардагерлермен кездесіп, атом электр станциясының артықшылықтары туралы пікір алмасты.
Полимерден жұмсақ қаптама шығаратын «Новопэк» ЖШС зауытының еңбек ұжымымен кездесуде, штаб мүшелері өнеркәсіптік кәсіпорындардың жүйелі жұмыс істеуі үшін тұрақты энергиямен жабдықтаудың маңыздылығын атап өтті. Мәжіліс депутаты, «AMANAT» партиясы фракциясы жетекшісінің орынбасары Павел Казанцев АЭС – жаңа жоба ғана емес, сонымен қатар инвесторларды тартуға және жаңа жұмыс орындарын ашуға қажет ұзақ мерзімді шешім екенін айтты.
"Біз аса маңызды мәселелер шешілетін дәуірде өмір сүріп жатырмыз. Оның бірі – атом энергетикасы. Еліміздің оңтүстік өңірлерінде электр энергия тапшылығы пайда болды. Аталған аймақтарда гидроэнергетиканы қамтамасыз ететін қуатты өзендер де, көмір өндірілетін кен орындары да жоқ. Яғни, бірден-бір дұрыс шешім – АЭС құрылысы. Күн мен жел энергиясын қазірдің өзінде пайдаланып келеміз. Алайда, олар – тұрақсыз. Бүгін шайдай ашық аспанды ертең бұлт торлап тұрады. Атом энергетикасының барлық басқа энергия көзінен айырмашылығы сол, ол ұзақ жыл тұрақты әрі қуатты энергиямен қамтамасыз ете алады. Бұл – жай ғана қажеттілік емес, заман талабы. Миллиондаған адамның жарқын болашағын қамтамасыз еткіміз келсе, біз одан бас тарта алмаймыз", – деді халық қалаулысы Павел Казанцев.