Ресейлік «Росатом» компаниясы елдегі алғашқы атом электр станциясын салу жобасы бойынша халықаралық консорциумның көшбасшысы атанды.
Екінші орынға қытайлық «China National Nuclear Corporation» жайғасса, француздық «Électricité de France» пен кореялық «Korea Hydro & Nuclear Power» ұсыныстары үшінші орынды иеленді, деп хабарлайды aqshamnews.kz 24.kz-ке сілтеме жасап.
Қазір экспорттық қаржы тарту мәселесі пысықталуда. Ашық және бәсекеге қабілетті диалог аясында реакторлық технологиялардың жетекші әлемдік өндірушілерімен келіссөздер жүргізілді. Аталған компаниялар елде АЭС салу бойынша техникалық және коммерциялық ұсыныстардан тұратын материалдардың кешенді пакетін ұсынды. Мұнда құрылыстың болжамды құны, жобаны іске асыру мерзімі, жұмсалатын қаржы мәлімметтері қамтылды.
Елдің Атом энергиясы агенттігі халықаралық сарапшылардың қатысуымен барлық ұсыныстарға кешенді бағалау жүргізді. Ол АЭС қауіпсіздігі, технологиялық және қаржылық аспектілер, халықаралық тәжірибе, кадрлар даярлығы, жергіліктендіру деңгейі және өзге де көрсеткіштер бойынша жүзеге асырылды.