Алдағы референдум «еститін мемлекет» тұжырымдамасының жүзеге асуымен толық сәйкес келеді, деп хабарлайды aqshamnews.kz
Саяси ғылымдар докторы Жомарт Симтиковтың айтуынша, Қазақстанда атом электр станциясын (АЭС) салу мәселесі бойынша референдум өткізу «еститін мемлекет» тұжырымдамасын жүзеге асырумен толықтай үндеседі.
– Алдағы референдумды демократиялық процестің оң аспектісі ретінде қарастыруға болады. Ең маңыздысы – физика және ядролық энергия саласындағы мамандардың пікірі ескерілетін болады. Менің ойымша, елімізде атом станциясын салу энергетикалық және экологиялық мәселелерді шешуге мүмкіндік береді. Бұл «Жаңа Қазақстан» мақсаттарына жетуге, соның ішінде әділетті қоғам құруға септігін тигізеді, – деді ғалым.
Жомарт Симтиков АЭС құрылысы Қазақстанда бірқатар бағыттарды дамытуға мүмкіндік беретініне тоқталды.
– Біріншіден, бұл елімізді энергетикалық тәуелсіздікке жеткізеді. Екіншіден, энергетика саласындағы аймақтық бәсекеде көшбасшылық орынды сақтауға мүмкіндік береді. Үшіншіден, цифрлық технологиялардың дамуында энергия тапшылығын болдырмауға көмектеседі. Төртіншіден, осы салада білікті мамандар даярлау жүйесін дамытуға ықпал етеді. Бұл тізімді әлі де жалғастыруға болады, – деп атап өтті сарапшы.
Сарапшының пікірінше, референдум өткізу фактісі елімізде ашық қоғам қалыптасып жатқанын, онда билік пен халық арасындағы диалог жұмыс істейтінін, маңызды мәселелер азаматтардың қатысуы мен пікірі ескеріле отырып, демократиялық жолмен шешілетінін дәлелдейді.
– Менің ойымша, АЭС салу еліміздің әлеуметтік-экономикалық ахуалын жақсартуға ықпал етеді, – деп түйіндеді Жомарт Симтиков.