Қазақстан Республикасының Президенті Қасым-Жомарт Тоқаев Қазақстан халқы Ассамблеясының ХХХІV сессиясында сөйлеген сөзінде Қазақстанда ешқашан азаматтарды ұлтына, дініне немесе тіліне қарай кемсітуге жол берілмегенін және болашақта да берілмейтінін қадап айтты.
"Барша азаматтарға бірдей мүмкіндік берілген. Бұл – нағыз әділдік, әділетті мемлекеттің ажырамас бөлігі", – деді Мемлекет басшысы.
Ол ел бірлігі мен татулығының мемлекеттік саясаттың негізгі тұғыры екенін және бұл стратегиялық бағыттың болашақта да сақталатынын атап өтті.
"Түрлі этнос өкілдері бір шаңырақтың астында бір үйдің баласындай тату-тәтті өмір сүріп жатыр. Бұл – мағынасы терең нақты жетістік", – деп түйіндеді Тоқаев.
Президент өз сөзінде мемлекеттік тіл – қазақ тілінің қолданыс аясының кеңейіп келе жатқанын нақты деректермен жеткізді.
"Бүгінде түлектердің 80 пайызы Ұлттық бірыңғай тестілеуді мемлекеттік тілде тапсырады. Биыл алғаш рет мектепке баратын балалардың 70 пайыздан астамы қазақ тілінде оқитын болады", – деді ол.
Бұл көрсеткіштер тіл саясатының нәтижелі жүзеге асып жатқанын және халықтың ана тіліне деген сенімі мен сұранысы артып келе жатқанын көрсетеді.